吳君如迷戀劉華,通行都知,今次藉住頒獎嘉賓身份,再次大讚劉華又叻又勁,咁大年紀仲可以搞大人個肚。唏,自古成功在嘗試。陳可辛或者更叻更勁呢?
香港金像獎頒獎典禮於周日(15日)圓滿結束,賽果不但實至名歸,眾人更係妙語連珠。
劉嘉玲雖然失落女配角獎,不過整晚得老公梁朝偉陪伴在側,難怪佢風騷表示:呢個就係獎。有萬人迷做老公,已經係大獎,仲有佢身上一億鑽飾呢,超級無敵大大獎啦。
憑《桃姐》6度封后嘅葉德嫻則慨嘆咁話:六十幾歲人先攞到呢個獎,相信以後都冇乜呢個機會。唉, 咪咁多愁善感至得𠺝。遲嚟好過冇到,係咪先?
司儀鄭中基亦大放笑彈,借舊作《月滿抱西環》諷刺時弊,大家要擁抱西環、愛護西環同適當時多謝西環。係呀,下次攞獎,藝人多謝fans,多謝評審,記得記得仲要多謝西環。
70歲嘅盧海鵬憑《奪命金》贏得「最佳男配角」獎,致詞時不忘大拋金句:正所謂盧海鵬試咪,能夠攞到個獎咁威。盧海鵬試咪必定爆粗。莫講話佢,媽咪姐一知鵬哥攞獎,都即時「試咗咪」 。 ####
留言列表