時光倒流二十四年,清純脫俗的葉蘊儀接拍維他奶廣告,一鳴驚人。來到今天,她雖然仍是一臉稚氣,但卻成了獨力撫養一子一女的單親媽媽;對她而言,子女與父親只是不同居,沒有甚麼特別,「我一啲都唔覺得吃力,單親家庭都可以好開心!」

葉蘊儀樂天、勤奮、不自怨不自艾的性格,正是讓孩子踏上正途的榜樣,「教育子女唔係講就有用,我自己覺得身教好重要,家長自己做得好嘅話,細路就自自然然被你感染!依家呢個時代,你唔能夠管得啲仔女咁嚴o架喇,最緊要同佢哋好似朋友咁傾多啲偈。」從母到友,關懷、信任、愛護、體諒,在過程中,從冇到有。

十四歲首次拍廣告的葉蘊儀,一副洋娃娃臉曾經迷倒不少少男,事隔多年,育有一對子女的她,稚氣還在。

葉蘊儀跟女兒Natalie的感情特別要好,兩母女還不時也會相擁入睡。

朋友式相處

葉蘊儀於九五年下嫁香港玩具富商陳栢浩,○○年離婚,一對子女由她撫養,長子Nodin今年已經十六歲,就讀中四,幼女Natalie則十二歲,就讀小六。她說,兩個子女性格溫馴又聰明,令兼顧黏土學校及家庭的她不感吃力,「佢兩個不嬲都冇發脾氣,性格獨立,唔使我操心。我覺得同仔女相處最緊要好似朋友咁,同佢哋分析多啲,而唔係去鬧去管,依家呢個時代,啲細路唔管得o架喇!」

為免子女變得早熟,葉蘊儀特意安排兒子入讀男校,女兒入讀女校,「社會太進步喇,太多唔同嘅資訊,就算佢哋接觸唔到,佢哋嘅同學都接觸到,咁最好喺佢哋未成熟前,分番男還男、女還女,我覺得會好啲囉!我個女依家放學返嚟都會同我講啲同學鍾意邊啲男仔,我咪同佢講:『我就覺得十八歲之後先拍拖好啲喇。』我會聽佢講嘢,趁機提點吓佢。」

○○年離婚的葉蘊儀,獨力撫養一對子女,並以朋友方式相處。

葉蘊儀與女兒的感情特別要好,偶爾會相擁入睡,而女兒也跟母親一樣喜歡藝術創作,黏土、畫畫技巧純熟,更懂得諗計仔o氹媽媽開心,「有一年情人節,個女吼我入咗房睇唔到,喺個廳張枱上面鋪滿晒啲花,我行出嚟睇到,咪問佢點解有錢買囉?原來啲花係之前一日哥哥生日派對上裝飾用嘅,佢偷偷哋攞咗返嚟送畀我。」葉蘊儀雖沒有直接道出感受,但從她彎彎的嘴角中,可感到絲絲暖意和感動。

既要為黏土學校出心出力,又要修讀藝術碩士學位,葉蘊儀為免忽略家庭,一直堅持一星期返家四晚,陪伴一對子女共進晚餐,「佢哋放學返嚟又要做功課,可能大家相處嘅時間只得一至兩個鐘頭,之後佢哋就要瞓覺囉,所以我覺得夜晚餐飯好緊要,係親子嘅珍貴時間。」

八十年代,葉蘊儀的清純可愛的臉孔,為她帶來不少粉絲及工作機會。

arrow
arrow
    全站熱搜

    stacylife 發表在 痞客邦 留言(0) 人氣()