曾以為去年底爆出一單「傅穎被男友虐打」的桃色新聞,涉案的羅仲謙被扣上「暴力男」之名,本來憑40吋巨胸彈起、前程似錦的他應是萬劫不復,可偏偏峰迴路轉的吉人天相。殺人一萬,自損三千,而由原告變被告的那一位,更差點全軍盡墨,又一次證明「性格決定命運」。事隔多月,27歲的羅仲謙為新劇《On Call 36小時》宣傳,由之前的《缺宅男女》到將於今年中播出的《飛虎》,他不單在這盤結錯綜的桃色糾紛中全身而退,新的緋聞女友更是由年齡到級數都全面升呢的楊怡。大難不死,必有後福,我信。「呢件事上冇人全身而退,呢個record會一直跟住你,只不過……當你有工作時會好感恩囉。呢行做新人開始時需要新聞,俾人知道你係邊個,當你出咗名之後,就唔能夠揀新聞。所以經歷過之後,我覺得成個人都成熟咗。可能曾經會有個諗法,呢件事會將以前嘅努力抹殺晒,但呢一刻我唔會再諗。既然已成為我的歷史,冇得改變,又何必再執着。」也對,正如歌詞所說「讓往事流逝,一圈又一圈像煙,彼此的噩夢,做完留在夢那邊,於一起,沒好的事件,應該隔遠一點,背對背上演,桃色冒險……」在為登台而練歌的羅仲謙,會考慮試唱嗎?

食得鹹魚抵得渴
日前,美術部的同事在公司餐廳遇見正接受其他報刊訪問的羅仲謙,忍不住將偷拍照放上facebook大讚「真係好鬼靚仔」,跟住友人七嘴八舌補充:「花心男給我都唔要!」、「但佢都真係幾靚仔!」……以美可以抵過,恃靚可以行兇,世情就是如此。我相信,想了解一個人,不如從了解他的敵人開始。話說兩年前初入行,因採訪關係而傅穎跟我結怨,事後對方在blog上特別指名道姓「鳴謝」我,所以傅小姐之於我的印象,禮貌的說法是好強,難聽一點就是小器記仇報復心重。道行低如我者都知道,無論前者後者,在娛樂圈行走都是死症。所以當爆料一出,天秤傾斜往羅仲謙一方的因由,不難理解。


F:《FACE》 羅:羅仲謙
F:以後傳媒再問傅穎的事還會不會回應?
羅:唔再講啦,真係唔好意思,因為要交代的都交代晒,再講啲乜嘢對大家都唔好、對邊個都唔公平。最緊要係我開心發展時,佢亦開心發展,大家齊齊努力工作。
F:去年的事有沒有改變你什麼?
羅:每一行都有佢嘅難處,食得鹹魚抵得渴。我又唔會特別交代,要發生嘅始終會發生,我冇可能冇唔開心。咁我想問可以點?我都要繼續做嘢㗎啦,慶幸我呢一刻可以有好多工作接踵而嚟。我學識咗更加珍惜𠵱家擁有囉。(當時怕不怕演藝事業會終結?)會有危機感,可能真係好彩啦,身邊有一啲朋友……有佢哋嘅幫忙,令我解決得到。(什麼幫忙?)鼓勵囉,其實實質嘅嘢我覺得好難講,我識嘅又唔係老闆。當你個人心境平靜愉快舒暢,就好似行嘅路都順啲。當你成日都擔心嘅時候,咩嘢發展都唔好。好似人逢喜事精神爽一樣。以後無論發生咩事我都會多幾個處理手法,諗嘢會全面啲,唔會再好似以前咁單純;而且我都冇以前咁活躍,成個人沉(重)咗。
F:覺不覺得輿論一面倒支持你?
羅:我成日覺得一隻手掌拍唔響,但因由我唔會再仔細去講。過去咗就過去咗,但係我會話你聽,大家都有責任。我已經唔係一張白紙,我已經有一個record,呢個record會跟住你終生,可能到我退休,攞埋「萬千光輝演藝大獎」,報道一出都會有呢個record,但係諗開啲,每個人都有自己嘅歷史,不過你係公眾人物就會有個file被公開。
F:但大家已將你同崔建邦劃成「暴力男」的代表。


羅:我唔能夠改變以前嘅嘢,甚至好多人會咁諗我,咁我可以點啫?好嘅新聞、唔好嘅新聞我都只可以接受。
F:覺不覺得自己好幸運,可以大步𨂾過低潮?
羅:我唔會去諗係咪過咗個低潮,真係唔想鑽牛角尖,可能幾年之後諗番會覺得做咩要再諗呢?老實講,呢兩年經歷過好多嘢,我咪又坐喺度同你傾緊偈。咁不如好好哋珍惜呢一刻,為將來鋪路!
F:有沒有哪一單消息對自己打擊最大?
羅:最深刻有份報章話我有好多個女朋友(一腳踏13條船),嗰一刻我唔係嬲而係呆咗,眼都凸埋,只不過將凡合作過嘅人都寫晒落去。我會諗唔知有冇人信?關我咩事呀?可能2年後再同你做訪問,我可以當笑話同你講,但我𠵱家又未到呢個層次。

隨緣不是消極
F:最新的封面是關於你和楊怡……我還沒問完,為什麼你先笑了出來?因為心甜?
羅:其實我哋係朋友關係囉,只係我哋好唔避忌。(訪問之日正是情人節,有什麼安排?)做完訪問返屋企,同屋企人食飯。
F:現在學懂跟傳媒交手,凡事要保留來保護自己?那會不會坦白交代感情?
羅:私人感情我會留番啲空間。(不想好像陳豪和陳茵媺般受大家祝福?)如果將來我有伴侶,都未必學到佢哋,首先好多嘢要配合,未必自己想就得。(公司反對?)唔係,可能自己肯,人哋未必肯。(如果另一半肯公開呢?)可以配合,我冇所謂呀!雙方面協調過一定最好,得嘅就大家分享,唔得嘅就大家一齊捱過囉。(公司有沒有禁止拍拖、要你守色戒?)一直都冇,咁大個人唔會唔識分好與壞嘅。
F:那你與楊怡有沒有發展的可能?
羅:我哋係有約會、食飯,不過大家將件事誇張咗。只係我哋多對手戲又啱傾,之後又一大班朋友出嚟食過飯。至於會唔會發展,真係隨緣囉。(怎樣啱傾?)冇得解釋,好似我同你都好啱傾咁囉,人夾人緣。(會接受姊弟戀?)感覺冇分年齡嘅,自己又唔會抗拒,溝通到就ok。(但二人事業上有差距呢?被人挖苦你越級追求,不會感到難受?)如果你哋係真正相愛,呢個唔係重點囉。我又唔會話唔諗嘅。(女尊男卑喎?)Hey,乜嘢尊尊卑卑吖,到頭嚟不過係一場空!只不過大家𠵱家生活嘅價值觀會有呢樣嘢啫。
F:為什麼不停說隨緣、緣分?你相信命中注定?還是,有些問題只敢說隨緣來搪塞?


羅:因為好多嘢講定都未必會發生,好似有啲工作我想做但做唔到,但係成事在人,謀事在天。……我好細個就相信一句說話「百世修來同船渡,千世修來共枕眠」。今日我哋之所以坐喺度傾偈,可能前世我哋欠對方錢呢,有啲嘢要還嘅。(包括一些孽緣?)唔得,唔可以用呢個字眼。

不再執着
F:出事之後,家人有沒有為你擔心?羅:將心比己,我知道佢哋係擔心,但佢哋唔會好直接咁講呢件事,只係好隱晦問「今晚返唔返嚟食飯呀?有你鍾意食嘅乜乜乜呀!」;有時又一齊放吓狗呀、行吓街,其實我知道佢哋嘅目的係乜,感受得到,但係咁先內疚嘛、咁先傷心,但係我又唔可以俾佢哋知道自己唔開心。其實我自己係大孫,背負咗好多期望,同埋又係男人,會覺得有責任要take care所有人,所以有啲嘢要擺喺個心入面。我唔開心就出海游吓水、望吓啲魚,就會開解到自己。玩潛水我領略到一樣嘢,呢個世界好大,我唔算得係啲咩嘢,就唔會再執着,不如諗吓點樣做好自己,自己係人哋個仔、係人哋個侄、係人哋個孫,第時仲有機會係人哋個老公、爸爸。


F:現在事過境遷之餘,在TVB又一劇接一劇上位在望,家人可以放心啦!羅:呢一刻我會因為屋企人為我驕傲而開心,亦都因為屋企人為我擔心而唔開心。佢哋到今時今日都仲覺得做藝人係一份唔紮實嘅工作。𠵱家佢哋可能覺得多咗機會喺電視機見到你嘅工作,會開始安心啲,最好個個月都見到你添,證明你忙到不得了!其實同我最close反而係伯父,而且好細個已經明白,就算爹哋媽咪分開咗,佢哋都仲係我爸爸媽媽,呢樣嘢唔會變,所以我嘅家庭觀念好完整。而伯父嘅家庭觀念好影響到我,佢做人好擔帶,雖然佢冇結婚冇仔女,但佢會照顧埋細佬嘅家庭。以前睇住啲長輩嚟大,我成日都會諗佢哋想要啲咩呢?有時會內疚,好耐冇返屋企見吓佢哋。可能佢哋想每日都見到你、想一齊食吓飯。當你知道嘅時候,我嫲嫲已經過咗身,所以你知道有啲嘢唔係永恆。

那些年的日劇迷
訪問尾聲,我跟羅仲謙的經理人「投訴」80後的他何解暮氣沉沉,經理人溫馨提示我,不如問問他的偶像是誰。「未入行前我好迷日劇《巨星夫婿》嘅女主角竹內結子。」即是由長瀨智也主演、講述秘婚明星的故事。「係呀,長瀨智也好有型㗎!喺劇入面、喺外面佢好有型,但返到屋企就(喊)『老婆、老婆』!我好鍾意《巨星夫婿》同《我要發達》(96年曾於亞視播出)!你有冇睇過《我要發達》呀?我好鍾意織田裕二㗎!」羅仲謙說得興奮,連本來低沉的嗓子都高了八度,即時回春。本來我還想問他有沒有追看竹內的新劇《草莓之夜》,但一想到她演的是慘遭男性施虐的角色,既然羅仲謙難得盡現性情,我又何必自討沒趣? ####


羅仲謙在《On Call 36小時》擔正第二男主角,在戲中飾演一個有天分但玩世不恭的見習醫生,與前輩楊怡有感情線。《蘋果日報》圖片


本來打算投考紀律部隊的羅仲謙,去年1月夥拍馬德鐘等人拍關於飛虎隊的劇集《飛虎》,他說算是一嘗心願。


羅仲謙和楊怡被指因合作《On Call 36小時》而戲假情真,更被拍到萬聖節當晚到大埔BBQ,甚至有指羅於友人面前數女方正值狼虎之年。


去年8月羅仲謙與傅穎的感情糾紛鬧至滿城風雨,更爆出動粗事件,最後二人在公司安排下分別開記招回應。


05年羅仲謙陪女朋友試鏡而被公司星皓發掘入行,跟劉心悠合拍電影《阿嫂》,「我覺得家嘅發展不過不失,如果keep住咁嘅進度,做到40歲應該唔差。」《蘋果日報》圖片


羅仲謙中五畢業,在青衣灝景灣任私人泳池救生員,當時已月入萬多元,直至05年入行亦繼續兼職,幫補生計。


在01年日劇《巨星夫婿》裏,長瀨智也飾演外表cool爆但私底下老土傻氣的明星,與妻子竹內結子為隱瞞婚事而鬧出不少笑話。

arrow
arrow
    全站熱搜

    stacylife 發表在 痞客邦 留言(0) 人氣()