自恃美貌嘅夏迎春（陳敏之飾）不甘地位唔及貌醜嘅鍾無艷，加上身邊親人慫恿，於是下定決心要同鍾無艷鬥到底。

陳敏之憑《怒火街頭》嘅索腿妓女成功走紅後，喺電視台花旦買少見少下，有樣有演技嘅佢，立即備受力捧，喺新劇《東西宮略》跟另一花旦陳法拉同為第一女主角。陳敏之喺《東》入面飾演反派夏迎春，跟飾演醜女鍾無艷嘅陳法拉除咗喺劇內展開連場惡鬥外，原來熒幕下，有指陳法拉扮大牌，令陳敏之不滿而傳出兩位阿姐不和。好睇指數，絕對比新鮮熱辣嘅唐宮、西宮精采。播映日期﹕2月27日起周一至周五晚8:30pm　翡翠及高清翡翠台

 
《東》劇開拍時已是非多多。起因係劇中飾演鍾無艷嘅陳法拉，自恃為一線花旦，覺得剛剛升呢嘅陳敏之擔正做夏迎春唔夠格，最唔忿氣係戲份同自己一樣多。為顯自己一線地位，拍劇期間不時擺「阿姐」款。陳法拉呢種行為，令全劇女演員不滿而杯葛佢，連一向出名好脾氣嘅陳敏之都頂唔順暗藐法拉。現實中兩位花旦已經鬥到難分難解，咁劇中佢哋又點鬥法呢？話說齊宣王（郭晉安飾）因為跟燕國比賽蹴鞠落敗，為重振國威，專程到深山尋找高人鍾無艷（陳法拉飾）幫手，並一時口快以條件任開作回報。誰不知事成後，鍾無艷竟獅子開大口，話要做皇后，但齊宣王啱啱應承納靚到絕嘅夏迎春為后，諫官晏英出計，將兩人分為東宮同西宮。強悍嘅鍾無艷做皇后，本意係想幫皇帝打理國事；而迎春呢，則以綿裏藏針招式、伺機報仇。由此引發兩位皇后嚟個「軟硬兼施」大鬥法。《東西宮略》演員配搭其實算新鮮。有陳法拉肯獻醜、陳敏之剛升呢做反派、視帝郭晉安做鹹濕皇帝，加埋搞笑能手阮兆祥，都算係一個非一般嘅鍾無艷故事。

造型馬虎
陳法拉嘅鍾無艷，同鄭秀文嘅《鍾無艷》造型差唔多，都係喺面部畫粒星，比起92年《無頭東宮》嘅陳妙瑛，陳法拉呢個鍾無艷造型就簡單得多。 ####


齊宣王一日到黑掛住同夏迎春遊山玩水懶理國事。正式係有事鍾無艷、無事夏迎春。


齊宣王其實係典型二世祖，淨係識吃喝玩樂，對身邊嘅信陽君（黃智賢飾，左）一直虎視眈眈自己皇位仍懵然不知。


諫官晏英雖然足智多謀，但為求自保，永遠唔敢講真話，應聲蟲一隻。反之梁烈唯飾演嘅史官端木正，人如其名，忠心耿直，兩人係宮中一對孖寶。


鍾無艷因為醜樣而俾屋企遺棄，得師傅鍾離子（阮小儀飾）收養，仲傳授佢武功、兵法及奇門遁甲。加上無艷性格樂觀，所以喺未遇到齊宣王（郭晉安飾）時，佢生活得好開心㗎。


2001年 電影版《鍾無艷》


92年電視劇《無頭東宮》

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄