有事鍾無艷的唐英年,宣布參選以來無論遇着僭建醜聞抑或婚外情風波,都搵老婆出來擋子彈,眼紅紅上演恩愛騷博同情。不過鏡頭下,唐英年名副其實是「大難臨頭各自飛」。
僭出大頭佛
唐英年名下、位於九龍塘約道七號大宅,上周爆出僭建風波,在人證物證俱在下,唐英年最終局住認,不過就卸膊指僭建完全是唐太的主意,自己初時並不知情。
阿仔避鋒頭
自從唐英年的醜聞陸續被揭,一路上陪住老竇的大仔唐嘉盛亦突然冇影。自上周五(17日)返回大宅後,嘉盛一直未有公開露面。
續演恩愛騷
去年有報道指唐英年因買紅酒而戀上外籍女,更有指他秘藏一名私生女在歐洲。為了澄清傳聞,唐英年繼續用同一招,和老婆手拖手行街,高調任影。
暗撐到底
只會同聰明人做朋友的周星馳,已落實將自己一票投俾唐唐。雖然有指星爺眼見唐唐卸膊,而在記者面前當眾妖爆唐,但據知他其實暗撐唐到底,算是最專一的藝人。
執番身彩
黎明本來有份提名唐英年做特首候選人,卻因未登記做選民,臨時被取消資格。近日唐唐如落水狗,黎明真係執番身彩。
促唐退選
曾志偉話:「唐英年係一個好人,不過近日咁多風風雨雨,佢都係退選啦,對佢對香港都係一件好事。」
寸無智慧
阿倫話特首應具備智、仁、勇三大條件,笑指唐英年:「佢智係弱咗啲,差少少,未夠機智。不過要有齊呢三方面嘅人,我仲未見到。」
選我好過
去年成為灣仔區區議員的白韻琴,就指唐英年冇資格做特首,她說:「我諗緊係咪去報名參選,不如選我好過,唐英年乜形象都冇,點做特首。」
揀唔落手
薛家燕表示近日流言太多,不知孰真孰假,又話:「我大女同唐唐個仔係同學,佢一家俾我感覺關係好和諧溫馨。特首呢個位係三煞位,好唔好都俾人話。嗰幾個提名無個係我心水,無一個適合。」
特首有樣睇
全城圍插唐英年,但堪輿學家譚雲龍指今年唐英年開始行大運,他說:「佢十年大運依家開始,不過是非呢十年不斷。他面相人笑面不笑,怕事兼承擔力不足。」他更論盡其他準特首,稱梁振英最有特首相。
梁振英
「相學嚟講,佢嘅眉『鷹揚豹變』係好難有。命格『火練季金格』,係猛人命格,加上佢今年行大運,12年三奇會局,會有奇逢奇遇,非常難得。唔排除做特首。」
葉劉淑儀
「佢05年開始行『忌神之運』,運勢走下坡,會有好多煩惱。八字命格太強硬,獨行獨斷,冇轉彎餘地。加上佢眼神不足,唔夠凌厲,做特首機會好渺茫。」
何俊仁
「佢命格非常聰明機智,膽識過人,敢於承擔。但雙眉氣勢弱,眼神唔夠銳利,09年開始行正印運,係破格之運,只能守不能進,絕無勝算可能。」
曾鈺成
「佢面瘦削,眼神柔弱。命格『正印高透』,為人太正直,變通力薄弱,非特首之相。」
鄭丹瑞筆伐龍豬
除咗key圖玩謝唐唐,阿旦鄭丹瑞仲上載咗一篇文言文喺微博,內容抵死爆笑,寸唐唐冇膊頭有外遇,又笑佢天生愚鈍成日亂噏,嗒落有味,就連阿旦都話可讀性極高。
市民唔撐
周三(22日),記者在將軍澳做街訪,訪問了20位市民,有九成人唔撐唐唐。
鬧唔爭氣
年約70歲的老先生:「唐英年經驗就夠晒喇,但斃在佢又唔爭氣,最近仲傳佢同人老婆有關係,呢啲嘢好棹忌。」
漠視市民
懷孕八個月的陳女士:「我哋啲師奶梗係唔鍾意啲男人咁啦!加上唐英年咁有錢,點會理解我哋小市民有幾慘吖!起碼梁振英都提出話要解決雙非孕婦問題!」
斥講大話
打工仔盧先生:「唐英年冇資格做我哋特首,成日講大話,雖然感情始終係佢嘅私生活,但嗰個人妻嚟㗎嘛!我情願揀葉劉淑儀。」
強撐到底
現正讀中學,不願開名的女學生就堅持己見,力撐唐英年做特首,她說:「我雖然未夠年齡投票,不過我覺得私生活可以同工作能力分開囉,佢之前俾我感覺幾做到嘢咁囉!」 ####
爆出僭建風波前,本刊記者在中環巧遇唐英年和其太太郭妤淺在Cova買咖啡,當時唐太拎住紙袋,但唐生依然手插住袋,英姿颯颯行街。
民望因連串醜聞跌至新低,但唐英年依然硬要參選特首。周一(20日),唐英年挾住378張提名表格,正式報名參戰。《蘋果日報》圖片
自小於坪洲長大的林穎妍,雖然現年約四十歲並育有一名七歲大的兒子,但身材keep得唔錯。
唐英年在父母的逼使下,於1984年正式迎娶郭妤淺,二人結婚廿多年,到最近因為唐英年參選特首,而爆出他多次「感情缺失」。
留言列表