癡漢自白　韋家雄

多得拍攝途中鬧出癩蛤蟆韋家雄想吃天鵝肉葉翠翠的緋聞，我和很多觀眾一樣，才因此對《 4 In Love》裏的這對長短腳之戀產生興趣。於是乎，一見到他倆，第一件事是誇獎韋家雄宣傳手法高招。
「唔係為宣傳，我冇咁醒！」韋家雄否認宣傳，亦否認了自己對葉翠翠動過情：「我哋第一次合作，係想幫翠翠入戲！」
「係咩？我唔知喎……」擺明未夾過口供，翠翠的表情有點錯愕：「多謝！」
我再問翠翠，有沒有多少覺得韋家雄對自己好過頭？翠翠交番個波畀韋家雄：「咁你有冇呀？」
韋家雄一本正經回答：「入戲時要投入感情，拍完就要脫離感情，我反而會避開佢唔見、特登唔聽佢電話。」
翠翠明顯不太習慣被人拒絕，當面篤爆：「我都冇打過畀你……我要澄清呀大佬！」然後，韋家雄露出招牌傻笑尷尬圓場。
47歲的韋家雄與 30歲的葉翠翠， 5呎 4吋奀茄（韋卻自稱 5呎 7）遇上 5呎 9吋的港姐，不只回應緋聞時各執一詞，整個訪問過程，即使並肩而坐，內容和眼神也從來沒有對上 channel、擦出過火花。翠翠一味說自己不貪錢不求高帥富，刻苦耐勞默默耕耘；韋家雄的主題則是創造無數經典的金牌大導金像編劇韋家輝：「有個咁叻嘅大佬對我嚟講從來唔係負擔，我都有人欣賞㗎。」
電視劇情所以破格，是因為在現實中發生的機會微乎其微。欣賞韋家雄的人，我想，應該不會是葉翠翠。

韋家雄，今年 47歲，做廣告攝影師入行， 89年入讀亞視藝員訓練班走到幕前， 95年加入無綫。
外形所限，角色幾乎清一色懵盛盛、傻更更，代表作是《真情》裏的大力。雖然有個在圈中地位超然的哥哥韋家輝，韋家雄整個演藝生涯都堅持劃清界線不肯叨光。
正職是無綫大綠葉、副業設計燈光裝飾布置自設工廠，入行二十多年一直低調，直到去年九月在微博上瘋狂上載與葉翠翠甜蜜合照，和「回到家掛住你添」、「兩口子太開心啦！」等等愛的宣言，成為電視城癡漢代表人物。
現實裏面我其實好有自信，鍾意佢就會約佢出街，但一定唔會喺社交網絡咁寫法。話我高攀葉翠翠冇所謂，做乜都係幫自己入戲啫，但係雜誌話我喺女廁門口等佢出嚟，我覺得好猥瑣囉。我根本就冇做過，真係好 hurt。
計落我都單身咗十年。細個阿爸唔顧家，拋妻棄子，我成日提醒自己唔要重複佢行嘅路，想不到，同個女朋友拍拖九年，對方向我提出分手，話我對朋友仲好過對佢喎。我份人好衰，成日思想同行動唔一致，明明好想佢留低，硬係講唔出口，就好似 96年阿哥拍《一個字頭的誕生》搵我做一個角色，明明劇本吸引好想拍，都係拒絕咗。無謂啦！掂咗，人哋話我靠阿哥；唔掂，又話畀機會我都唔識珍惜，更加衰多幾錢重。我哋兩兄弟感情好好，似足佢筆下好多電視劇都會有嘅情節，阿媽係單親，窮，但係兄弟姊妹感情好好，大佬永遠好錫阿媽、錫細佬妹。


我阿爸開塑膠廠，生意愈做愈好，不過一發迹，就同個秘書搞埋，乜都冇留低就走咗，嗰年我十歲。阿媽同我哋四兄弟姊妹窮到連公屋嘅租都畀唔起，餐餐蝦醬撈飯，兩兄弟 12歲就要喺茶樓賣點心、送汽水、幫鯪魚肉檔批魚肉、做停車場看更賺錢。啲廚房佬落場好鍾意打我、又攞啲油漆喺我心口畫公仔，因為嗰年興《龍虎門》。我阿哥好腍善，佢大得我兩年，冇得幫我出頭，自己都成日俾人打。阿媽好硬頸，唔肯搵阿爸，我偷偷去阿爸太古城屋企問佢攞錢，見到佢哋一家開住冷氣打邊爐，返到嚟喊住講：「阿爸好有錢……佢哋打邊爐呀……」呢一幕，阿哥寫咗落劇本，嗰套劇叫做《新紮師兄》。係㗎，屋企好多經歷，阿哥都寫咗落電視劇。
我哋住唔起華富邨，搬去土瓜灣投靠舅父，咪就係《新紮師兄》入面個舅父東囉；講落，我阿媽真係有啲似蘇杏璇㗎。阿哥叻，對我嚟講唔係壓力，我都有人欣賞㗎。家我搞緊個劇本，係一個有關平行空間、利用時差改變命運嘅故事。我負責導演同劇本，家搵緊老闆囉。冇錯，阿哥係地位高、識得好多老闆，但係我都入咗行 23年，朋友都唔少㗎！


 
95年韋家雄過檔無綫，參演《真情》，在劇中與低低哋的苑瓊丹被配成一對，更曾傳出緋聞。《蘋果日報》圖片


葉翠翠　韋家雄
20年以來，韋家雄刻意在工作上與韋家輝保持距離，私底下其實兄弟情深。


葉翠翠　韋家雄
韋家雄 12歲撞破拋妻棄子的父親與二奶在太古城家中開冷氣打邊爐的一幕，被韋家輝寫在《新紮師兄》裏。


股神重生　葉翠翠

葉翠翠，現年 30歲， 05年度香港小姐競選大熱，兼是非多多風頭躉。 08年，葉與新加坡富商黃有龍傳出緋聞，月入 1萬卻突然一口氣購入兩層賽西湖千萬豪宅，一夜暴富。葉翠翠否認緋聞否認暴富，解話是與家人買股獲利，從此成為城中名嘴和股票專家揶揄對象。黃有龍 09年與影星趙薇結婚生女後，葉翠翠再沒有緋聞傳出，與港男高鈞賢也分了手，自稱現在單身。
至於去年 9月傳出被韋家雄力追，葉翠翠回應：「有啲人，第一眼見到佢你就知冇可能。」搵男朋友，我從來唔覺得一定要搵又靚仔、又有錢，仲要職業高尚嘅男仔。我覺得只要你愛對方，乜嘢都唔重要。要搵一個職業好、搵到錢嘅人有幾難？用條件去衡量一個人好容易，但係搵到真正對自己好嘅人最難。至於高度係唔係戀愛限制？我未試過俾矮過我嘅人追求，真係唔知。不過呢個世界乜都有可能發生，我都試過同朋友眼中「唔係吓嘛」嘅人一齊。
當人喺戀愛當中，好似生活嘅帳篷入邊，人哋講咩都聽唔到。對我嚟講，揀男朋友只得一個要求，一定唔可以係圈中人，太複雜啦！透明度太高啦。 08年嘅緋聞（黃有龍），點解會承受咁多，係我自己選擇。對方唔想公開呢段感情，我就選擇自己一個人揹晒上身，以為沉默真係可以保護呢段感情，等我一個去承受所有罪名。呢幾年，周不時就有新聞就有罪名強加喺我身上，如果係事實嘅話，點解冇人影到呢？如果真係如大家所講，條街咁多人、咁多記者，點解一張相都冇呢？原因好簡單，因為係假囉！咁多年過去，不斷被人抽水，明示暗示我係做新聞，唔緊要……我明白，跟風吖嘛，希望真係有幫到佢啦。一個女仔，一段咁長時間俾人針對俾人圍剿，其實係好事，經過呢一段，我人生豁達咗、諗嘢成熟咗，唔識我嘅人先至需要靠娛樂新聞去了解我，真正喺身邊嘅人唔需要，佢哋清楚我為人。做人唔介意得咁多，最緊要做好自己，時間可以證明一切，觀眾睇到、監製睇到、工作人員睇到㗎。


葉翠翠　韋家雄
08年與富商黃有龍傳出緋聞， 09年黃有龍與趙薇結婚生女，葉翠翠說當時為了保護戀情才選擇沉默。


葉翠翠　韋家雄
與港男出身的高鈞賢分手後，葉翠翠說：「以後都唔會再同圈中人拍拖，透明度太高、太複雜。」《壹週刊》圖片



去年 12月因為胰臟瘤入院做切除手術：「個天對我好好，所以個瘤係良性。」《蘋果日報》圖片


我都係呀，額頭寫住老襯兩個字。我 20歲就開始靠自己，一分一毫都係自己辛苦搵返嚟，所以守財守得好緊要。一部焗爐，都要格價。我屋企環境本來唔錯，中學仲有得去英國讀書， 97年金融風暴屋企變咗負資產，冇晒錢急 call我返香港讀大學。外國返嚟政府冇資助，要自己供自己，做 model、馬會同獸醫助護，同一時間打三份工，交晒學費，月頭得 5百蚊，我撳佢出嚟，真係諗唔到點用好，係食包定食麵好。以前覺得自己好慘，其實有幾慘啫，起碼仲讀大學喎！比起家三日冇得瞓，更加唔算得係咩！就算舊年胰臟生瘤，我始終覺得自己好幸運，因為個腫瘤係良性。個天不斷畀鍛煉我，又不斷畀機會我，你話我係唔係好幸運先？


天生一對


韋家雄說，覺得他天生是懵人的，除了監製，還有損友們：「 03年離開 TVB，朋友攞咗我一嚿錢積蓄同長期服務金話去投資，冇耐就話我聽蝕晒。前排聖誕，我話唔去，有個朋友又係都要捉我去話請食飯，又嗌餸又飲酒，埋單 7千蚊，佢先至話冇帶錢。邊個有心搵笨，我知㗎，我唔係心痛啲錢；係心痛個朋友，唔好篤爆啦，心知咪算囉。」
韋家雄未講完，葉翠翠搶住答：「係啦，我哋呢種人額頭鑿住個『蠢』字，專俾人搵笨㗎，好似我之前買焗爐之嘛，又話係朋友價、全城最平，好彩我格晒價，發覺佢開高咗價畀我，因為我係葉翠翠囉！」
甚麼時候，葉翠翠和韋家雄成了同類？我怎麼沒看出來？


葉翠翠　韋家雄


葉翠翠　韋家雄
去年 9月，與葉翠翠合拍《 4 In Love》被指用老歌寄意高攀港姐，韋家雄解話：「係幫對手入戲！」


葉翠翠　韋家雄


撰文：朱小博
攝影：范仲良
形象： Bryan@ the Flaming
服裝： Ted Baker
場地提供：皇家太平洋酒店



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄