今年39歲的鄭秀文（Sammi），長期被先天性哮喘困擾，經常要服食西藥暫緩病發，搞到口腫面腫，認真陰功。不過近年Sammi愛上運動，最高峰試過日跑八公里，跑足一
星期，令身體情況好轉。不過Sammi去年遠赴雲南香格里拉拍攝《高海拔之戀II》時，在零下六度的天氣下，來回跑落雪水池近十次，令她終於頂唔順，差啲爆發高山症，更要即時停拍返酒店休息。


雲南山區天氣惡劣，但Sammi自從有信仰後，所有事都順其自然，出發拍《高》片前，她說：「冇太大擔心，就交俾我嘅上帝！」長達兩個月的拍攝期，大隊最後安全無恙返港，但拍攝時曾發生幾段小插曲。

一度呼吸困難
據知Sammi、古仔和大隊抵埗當日，香格里拉正值大暴風雪，拍攝被迫延期外，亦因當地空氣稀薄，令一直有運動習慣、肺活量大的Sammi感到呼吸困難。不過休息了一晚，Sammi的身體回復正常，翌日便隨大隊到海拔更高的高山拍外景。這場在海拔四千米拍攝的外景，需要Sammi跑落水勇救古仔。當日氣溫只得零下六度，起初Sammi落水時亦無事，更主動向導演杜琪峯要求拍多幾個take。不過，到拍攝第十個take的時候，情況突然急轉直下，Sammi除了全身開始乏力外，更感到頭暈眼花和氣促，疑出現高山症狀。於是大隊便立即停機趕返酒店，更找來醫生為Sammi檢查，幸最終有驚無險。杜琪峯錫住Sammi，更決定停機兩日，待Sammi情況真正穩定下來才繼續拍攝。

劇組相繼出事
其實Sammi出發前已做足準備工夫，除了自備一箱強力暖包、帶埋電氈外，更自創一套獨門保命法，就是每日吃足三餐西瓜，吃足兩個月，增強體內的維他命C。對此Sammi說：「日日食真係幾寡，好彩杜sir太太會經常煲湯俾我哋飲。其實我跑咗步之後，哮喘病發嘅情況少咗好多，嗰場戲因為我用盡全身氣力去拖古仔上水，古仔又咁大隻，所以先搞到虛脫。」記者就Sammi這個獨門秘技問過關嘉美醫生，她說：「如果平日有做開運動，身體底子好嘅話，平時心跳頻率會慢啲，任何嘅飲食習慣都會冇事，仲會冇咁易有高山症。不過如果喺咁高嘅地方做過量嘅運動，身體機能點好都會出事。」 Sammi返港後繼續如常舉行多場世界巡迴演唱會，精力過人，不過劇組不少工作人員就冇佢咁好彩。據知不少工作人員到達香格里拉後，已經常感到四肢乏力和呼吸困難，有高山症徵狀。就算返港後情況依然沒有好轉，需要經常入院接受治療。一名不願公開名字的工作人員透露，她至今依然受高山症折磨，她說：「我一去到香格里拉，就覺得頭痛，連嘴唇都變埋黑色。返到香港仲有啲併發症，驚有細菌感染。不過Sammi好好人，知道我哋有事，都有去醫院探過我哋！」

病發有前科
電影《高海拔之戀II》下月9日上映，戲中Sammi和一班劇組人員拍攝時亦出現高山症，非常驚心。其實之前有不少藝人遠赴海拔高的地方工作時，亦曾爆發過高山症，差點冇命。

王喜　返港就醫
王喜08年為無綫抵達珠穆朗瑪峰，採訪北京奧運聖火傳遞時出現高山反應，返港後他立即求醫，情況嚴重，更大爆受無綫冷待，安排失當。

周麗淇　啪針抗病
周麗淇去年前往喜馬拉雅山進行慈善探訪時，突然頭痛兼經常嘔吐，事後需要在當地醫院啪針和服藥。 ####


攀山涉水 Sammi遠赴香格里拉高山搵老公，她誤把受困於雪水池的古仔當成老公，於是不惜跳落水救他。劇情感人，但Sammi就為這場戲險爆高山症。


叫咗你小心啲！（設計對白）

 
早前，Sammi與古仔出席《高》片宣傳活動，講及險爆高山症，Sammi猶有餘悸話：「我當時都驚會出事！好在休息兩日就OK！」

 
吸氧保命戲中亦有提及Sammi出現高山症，需要戴上氧氣罩保命，估唔到和現實如出一轍，假戲真做。


揹到腳軟 Sammi要浸落水拍戲，但古仔亦要揹住Sammi在雪地行足半日，這套愛情片認真辛苦。


心口劇痛戲情講在上山過程中，古仔因抵受不住空氣愈來愈稀薄，心口突然劇痛。據知當時古仔的確有點頭痛，拍攝時更七情上面。


終有得吸氧這場因發燒而要在醫院留醫的情節，是古仔拍攝以來最舒服，皆因他全程躺在病牀上，不用嘥氣。

 


跑步練氣 Sammi經常在寓所會所跑步，跑完步亦立即發微博鞭策自己，自詡是「八公里小姐」。身體咁好，難怪今次大步檻過。





arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄