相隔四年，再次訪問謝安琪，我發現，我倆記性都不差。她記得我的中文全名、記得那一年我挺着大肚子。我記得她和全家被名氣包圍、被傳媒圍剿時，她說自己看得開：「別人要說甚麼，由他去。」實情，她後來要食抗抑鬱藥…… 有時候，死撐是必須的。試想想，換着你被人說一朝得志、老公廢柴、一家大細被針對，不硬着頭皮死撐，不然呢？終於走過來了。

 
34歲的謝安琪說，人，一定要在最灰暗處才知道光明在哪裏、幸福何處尋。於是，有了新唱片《你們的幸福》，和快將舉行的紅館同名演唱會。謝安琪的幸福在哪裏？隱藏在新唱片裏。《你們的幸福》收錄十一首歌，有寫給兒子的、有寫給社會的，有唱環保的有唱新移民的，雖然不見張繼聰，不過，與謝安琪的對話，每一個點滴每一個體會都少不了張繼聰：「愈嚟愈感激個天俾我遇到佢，欣喜地見到佢改變，畀囝囝威嚴同信服、畀我放心同安心。所以今個聖誕，我寫畀老公一封三頁紙嘅情信。」聽出來了嗎？謝安琪的幸福之歌裏有一首hidden track，名叫〈張繼聰〉。

不要好多謝安琪
兩年前謝安琪第一次踏上紅館舞台，舉行一連七場《好多謝安琪吶喊演唱會》。明年1月的《我們的幸福2012演唱會》縮水到兩場，謝安琪說一點不介意被攻擊場數和天后地位不保，因為她要的不是「好多」謝安琪，要的不是做個量化了的歌手。當年真係好多謝安琪。成街都係雜誌封面、娛樂新聞，網站代言廣告同一時間推出，然後整整兩年被抹黑、被打擊，我覺得好唔公平，點解人哋二十年經歷嘅黑暗要一次過兜頭淋落我度。唔係我得唔得？我唔係死撐，我真係以為自己頂到，直到有一日對住碗飯都可以兩行淚珠係咁滴、住喺大埔郊區夜麻麻都覺得好嘈被好多聲音包圍，先至發覺要睇醫生。


我唔係鍾意做明星、唔想做俾人談論對象、唔貪圖曝光，我係想唱歌啫……有一段日子，我諗過返去教書、諗過去西貢開間鋪頭仔，人生好痛苦，我使乜為咗食碗飯留喺呢度？對我嚟講，離開呢行好容易，要留低反而難。呢個係一個好淺白嘅道理，人生最黑暗時就會見到最重要嘅嘢，包括仲留喺身邊嘅人，同信念。乜嘢係死都要揦住啲嘢，你就會知道乜嘢對你最重要。所以，都要多謝嗰段時間迫過我嘅人，俾我搵到唱歌以外另一個留低嘅原因，係我哋有能耐帶動別人、感動別人。兩年前，七場演唱會每晚唱三十多首歌，對我嚟講，每晚都係一個壓力繁重嘅考試。經歷過，我去到一個新階段，唔貪圖做一個量化嘅歌手，但可以適應自己任何狀態，利用嗰一刻嘅心情，做一次獨一無二最好嘅表演。

不要把我戲劇化
06年11月宣布懷孕，謝安琪與張繼聰的兒子張瞻現在剛滿4歲半。兒子還不到半歲時，就有報道指人妻謝安琪搭上人夫陳奕迅，緋聞炒得鬧哄哄。事過境遷，謝安琪說最無奈的是，一個人在新聞裏的角色是正派還是負面，大多數時候取決於媒體的風向。至於觀眾，有時候就是期待有的人生戲劇化，選擇相信杜撰的劇情。我哋兩公婆經歷過，我哋一早已經擔心，換着係阿仔被針對，點算呢？早一兩年，我都未ready，未識得面對呢個攻擊我嘅世界時，我選擇關好門窗、拉起窗簾，出街掩住佢個樣，好絕望地收得佢好埋。家，我唔等到有事發生，事先已經要佢準備定堅強，第一步，就係畀佢知道爹哋媽咪嘅工作。


早排，佢幫卡通片配音，一家三口出席首映。第一輪影相佢好合作、好開心，以為影完啦，食住爆谷坐喺位等電影開場，又有記者嚟請佢影相。小朋友耐性有限開始繑埋雙手：「我影咗啦！我嬲呀，係都唔影㗎啦！」我話畀佢聽，每個人都係善意，有邀請你影相嘅自由，你可以禮貌地拒絕，但係唔應該嬲。我想畀小朋友知道，出面永遠有好多唔同聲音同諗法，遇到時唔需要嬲，心平氣和做番自己咪得囉。
好多人鍾意演繹戲劇化嘅故事，好多人選擇相信，其實我嘅生活真係好簡單、好寧靜，我搬去大埔住，享受每日同屋企人有quality嘅相處，爭取每日晚飯前返到屋企。我哋兩公婆同每個家長一樣，分擔唔同角色，不過我哋意見一致，唔會打小朋友。因為張繼聰係嗰啲宇宙官，主張人人平等，永遠不能用暴力解決問題。張瞻覺得爹哋係一個好有能力嘅人，佢建立出嚟嘅形象，處理每一樣嘢都合理令人信服，張繼聰鎮服小朋友係用威嚴，到佢鬧你時，就自己都會自慚。

不要小看我的英雄
像大多數人母一樣，說起兒子，謝安琪話題源源不絕。也像大多數人妻一樣，謝安琪表面上分享的是兒子的點滴，體現的其實是丈夫的幽默、豁達與智慧，這叫情不自禁。


愈嚟愈崇拜我老公？係呀！我本來唔信星座，但個個一睇就知我老公係山羊座。佢性格堅毅，做每樣嘢都會堅持到最後、做得最好。結婚以後，我哋嘅遭遇係成長催化劑，我哋以前樂觀幼稚，結婚後遇到媒體壓力，我睇住佢變，睇住佢由一個咁典型嘅山羊，慢慢變成太極高手一樣，擁抱所有好與唔好嘅嘢，我好佩服佢。今次隻碟，題材已經夠，冇刻意去寫一首屬於老公嘅歌，其實心裏面，我好感激上天俾我遇到呢個人。無論遇到咩事，佢一定會喺度頂，一定搞得掂，唔需要我擔心。我都有一段時間擔心，點解我哋冇咗愛情，話題永遠係阿媽啲保險呀、阿仔揀咩學校呀、屋企冇廁紙，要訂啦喎……佢話：「階段嚟嘅，你估婚姻咁容易咩？愛情都唔會係咁猛烈嘅火燒一世嘅。但你唔需要擔心，愛情同感情一齊，唔會此消彼長。」我冇寫歌畀佢，但係我有寫情信畀佢。今年聖誕節禮物我已經送咗啦，我見佢成日都用環保袋，想送一個袋畀佢出街用。我哋結婚時嘅奶粉袋係個波點porter，我請人喺日本訂咗一個畀佢，連埋一封三版紙嘅信。我話畀佢聽，好多謝佢咁多年嘅包容同支持，我哋嘅家庭係由呢個袋開始，見到呢個袋係想提醒佢，佢揹住嘅唔係一個重擔，係我同阿仔嘅支持。

再見張真人
難過的日子，謝安琪看了半年心理醫生，吃了半年抗抑鬱藥，那張繼聰呢？「佢都有暴躁過、唔開心過，但我好佩服佢，我喊完成晚，第二日眼腫腫繼續消沉，佢一天光好似打開新嘅一頁，又開心番。佢話道理其實好簡單，所有攻擊、所有批評、當一場夢就得。發噩夢瞓醒覺唔會成真，攻擊同批評難道就真有其事、真係有可以改變到我哋咩？」咁啱張繼聰新碟上市又有舞台劇面世，未來專訪又將輪到張繼聰，張真人到底是如何迷倒天后Kay，容後再續。 ####

 


我唔係死撐，我真係以為自己頂到……


明年1月13、14日，謝安琪在紅館舉行《我們的幸福演唱會》：「我請咗琵琶音樂家孫穎，同克羅地亞古典結他演奏家安娜•維多唯契，相比第一次紅館個唱，我家至知我想做一個點樣嘅歌手，開一場乜嘢演唱會。」


上週二（20日），電影《踢躂小企鵝2》首映，謝安琪現身支持聯合配音的張繼聰與張瞻：「配音酬勞我教佢自己分配，可以買玩具、亦可以選擇捐一部分畀小朋友，佢諗都唔諗就話捐晒畀小朋友。」《蘋果日報》圖片


09年，一首〈囍帖街〉讓謝安琪橫掃頒獎禮直升天后神台：「我喺小公司走出嚟，我都捱過唔係一朝得志。好可惜，低潮時好多雪中送炭嘅人喺嗰段時間遠離我，佢哋以為我變咗。」


09年5月，謝安琪請來傳得㷫烚烚嘅「緋聞男友」陳奕迅做演唱會嘉賓，被指與陳奕迅有染，謝安琪曾經灑淚回應：「話我勾佬係侮辱。」《壹週刊》圖片


中學就讀大埔恩主教書院，大學入讀香港大學文學院，好學生謝安琪入行前教過鋼琴和英文：「我諗過唔唱歌返去教書，對我嚟講走好易，留低反而最難。」


06年宣布懷孕，07年結婚然後生下兒子，謝安琪與張繼聰走在一起以來一直被指擔起養家重任：「老公份人好逞強，俾人講啲咁mean嘅說話，我都曾經擔心過佢。」


謝安琪有多崇拜張繼聰？盡在不言中。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄