屋企最重要嘅傢俬，除咗床，就數到電腦椅！ Home Office、上網追劇，一日埋電腦位三、四粒鐘走唔甩，公司嗰張唔到你話事，屋企嗰張囉喎，教完你點揀即刻拍板做番老細自己話事！記者：朱崇德攝影：蔡家輝Model： Mia@GME
其他副刊影片 Take A Glance：達爾文加個轆 放大圖片 
辦公椅可以話係電腦椅前身，根據維基網資料，估唔到佢竟然同《進化論》嘅達爾文有關！簡單講，達爾文為咗方便自己做採集標本研究，坐住張椅碌嚟碌去拎嘢，於是就喺椅腳加轆，就係咁改造咗一張普通座椅，可以話係辦公椅嘅前身。
電腦椅， Check it！ 放大圖片 
■張椅點 Fit都好，每坐半小時至一小時，最好起身做吓伸展，有助舒緩肌肉痠痛。
揀電腦椅「係咁意」試坐並唔足夠，仲好易俾第一印象蒙騙！事關張椅有機會經上一手試坐而調校過，未必即刻切合你身形，所以事必要「手多多」，左校右校，唔怕面懵試均真。
1.手柄：手臂自然成 90° 放大圖片 
手枕必須可調整，令手臂自然垂直呈 90°最佳角度！既可減輕肩部壓力，上身重量亦因手臂得到承托而分散，大大減輕腰背受壓。一些高質電腦椅，手柄更可向內或外八字橫向調校，就番手部擺位對應枱面電腦鍵盤、滑鼠位置，令整個前臂全程緊貼手柄之上。
2.椅高：腳板垂直放平 放大圖片 
最佳椅高係當你坐上之後，腳掌自然垂放地面，膝蓋內側與坐墊留有一至兩隻手指位空間，太貼會有頂腳感覺；虛位太多又會唔夠承托，坐得耐好易攰。
3.坐墊：微微前傾腰更直 放大圖片 
坐得耐腳痹同膝蓋屈曲角度過大或過細、影響血液循環有關！一啲體貼設計，坐墊最前端會做成微微前傾，何解？就係令膝蓋角度稍稍高於 90°（約高 3-5度），上身就會自然微微前傾，令腰部更挺直！如果膝蓋等於或低於 90°，人就會不期然弓起條腰，引致腰痛。
4.椅背：可調校「腰頂位」 放大圖片 
■腰頂位啱唔使咕！
某啲椅背會呈「大肚」凸起狀，呢個就係腰頂位！最佳腰頂位置應該托住背部、肩胛骨對下兩邊凸起肌肉，阿媽會話呢個係「豬扒位」！高價電腦椅腰頂位更可以自行調校高度，切合任何人的體形。
5.椅轆：硬轆加張地毯 放大圖片 
■硬轆唔傷地板，加張地毯就得！
有人話軟地用軟轆、硬地用硬轆，請教 aluminium Director David：「好多人怕硬轆會壓凹如木板呢類軟地板，但係凹痕其實同人體加椅嘅重量有關，軟硬轆結果都係一樣，加張地毯先真正起到保護地板作用。」
6.面料：輕磅玩網重磅要皮 放大圖片 
近年興起網料做椅面，貪佢疏氣又舒適，不過唔係人人啱坐，就如筆者係超重磅人士，一坐上去，網料完全凹陷，承托力不足；重磅人士如我就要改選布料或皮料。
﹝靚玩類﹞懷古大班 Look： 放大圖片 
電腦椅唔係一味講功能，有時都要同屋企陳設配合！呢張椅仲係現時流行皮面釘鈕，椅面有少許凹陷弧度，舒適感出晒嚟。DELUX$1,590/c
玩味織皮： 放大圖片 
靠背皮織設計，配圓柱式皮套手柄，玩盡現代感。設計方方正正，平凡中見精細，最適合現今簡約家居主義用家。WEB-WHEELA$1,390/c
簡約黑撞白： 放大圖片 
潮玩近年倡導嘅簡約主義，全膠料設計，座椅部份一個模倒模而出，全無夾口位，感覺係一體成型！有白、藍、橙、灰、黑多色，最重要價錢唔太貴，現代主義家居最合襯。Spoon chair$4,999/a
Old School設計： 放大圖片 
椅背是一整塊厚皮製成，緊貼背部弧度，再加上粗邊電鍍銀框架，令佢更顯貴氣。TUCKER$1,390/c
﹝功能類﹞博物館珍藏級： 放大圖片 
Herman Miller嘅 Aeron chair係 94年嘅設計，椅身網料，手柄可上下及內外八字橫向調校，椅背上下調校式腰頂， Seat位獨門 Forward Tilt功能，即係微微前傾令坐者腰部挺直。老實！現時大部份同類椅都跳唔出佢個框框，致令佢贏得美國紐約 Museum of Modern Art成永久收藏！銀灰為 Titanium特別版，平玩有黑魂普通版，$9,500便宜好多。Aeron chair Titanium$13,000/a
電腦椅玩按摩： 放大圖片 
係按摩椅又係電腦椅，椅身設計符合人體工學，椅高、頭靠、背靠可微調。除可全身按摩，更可針對頸、肩、背或臀部作重點按摩，香港人家居空間有限，一椅兩用，抵！uJazz$6,980/b
自動調節靠背軟硬度： 放大圖片 
佢係 Humanscale巔峯之作！最強係佢嘅機械連動性：只要坐低，將手放於手枕，佢就會就住你嘅體重回饋相對合適的靠背軟硬度， Fit任何人士。另一賣點係頭枕，就算半躺椅上，靠佢嘅獨特連動設計，仍可保持水平視線。Freedom Chair$16,999/a
人氣熱賣： 放大圖片 
椅背玩網狀兼特高，仲有可調校高度頭枕，手柄可前後、左右、高低及八字形調校，價錢仲相當抵玩。IOO Office Chair$4,800/c
a.Aluminium（ 2546 5904)b.OSIM（ 2790 2300）c.G.O.D（ 2890 5555） 
■白皮面配柚木虎紋 Armadillo Chair
留言列表
{{ article.title }}
