○九年才復合的Swing，又告拆夥了，這次以十一月下旬舉行的演唱會作結尾，show名絕得不能絕，叫《Swing後會無期告別演唱會》，彷彿一切再沒轉彎餘地，着大家唔使旨意香港樂壇將來再有Swing出現。

「係真o架！唔係gimmick（綽頭）嚟o架！」Jerald陳哲廬認真地向我重複了六次。

「佢（Jerald）個囡已經廿二個月大，佢真係諗住同太太移民返加拿大湊囡，所以係真o架！」Eric郭偉亮補充，「我哋上次○二年拆夥時，冇好好哋去say goodbye，我哋唔想咁唔開心，依家圓圓滿滿咁搞個farewell show，好似代表咗我哋係有expiration date（有效日期），而唔係永遠都會喺度，我哋反而覺得好有型！你話嘞，有幾何有藝人會好正式咁同大家講唔玩，仲要係永遠咁離開呢個娛樂圈呢？」

喂，大佬，呢個圈no promise，no guarantee（沒有承諾和保證）呀！

Eric恍然大悟：「咁又係，你睇陳冠希（艷照事件）之後都仲有plug歌……」頓了頓，他又說：「不過我哋同佢唔同呀嘛！」Jerald即在旁附和：「佢（陳冠希）afford（承受）得起，我哋afford唔起呀嘛！」

大概，這兩位○一年還在唱着〈就當我未玩夠〉的仁兄，沒想過十年後的今天，會因為一個廿二個月大的BB囡，讓他們覺得在樂壇已經玩夠。

冇癮

Eric和Jerald認識於九七年。「我哋有個uncle喺呢行做唱片公司高層，佢識我哋屋企人，當時想搞一個組合，咁就介紹咗我哋認識。」Eric說。

Jerald接着補充：「個組合本來仲有陳子聰，但嗰陣子聰喺澳洲唔得閒，結果我哋冇等佢，就start咗Snowman呢個組合，等咗一年，九九年十一月出咗一張碟，我哋就簽咗英皇，改名做Swing。我仲好記得，第一次見到Eric，覺得呢個人好大隻，好似玩健身，body builder咁個喎！」

○九年重組Swing後推出的《武當》，MV找來了黃日華（後排左二）和劉丹（後排右二）演出，還有Eric女友葉佩雯（前排中）客串演出。

在旁的Eric即忍不住送他一句：「黐線！」然後跟我數Jerald：「佢好嘈，講嘢好大聲，佢好多嘢講o架！我最初都懷疑呢個組合得唔得，因為我同佢嘅性格同鍾意嘅嘢都完全唔同，後來開始做音樂，先發現佢有料到，啲chemistry（化學作用）click得好好！」

既然大家click到，何以○二年要解體呢？Eric解釋：「其實Jerald一開始已經冇諗住留喺香港，做完Snowman，佢已經話要走；後來簽埋英皇做完Swing第一隻碟，佢已經覺得算啦！我留佢，佢又想走，大家各持己見，知道拗唔到落去，就唔到對方啲乜，大家都冇癮，○二年我哋臨拆夥之前，已經有好一段時間冇嘢講，佢唔想做，真係冇得再逼！咁咪散囉！」

「我戇居囉！」Jerald在旁插嘴。「嗰陣我係有諗過娛樂圈係點，但我戇居地以為我可以改變玩法，覺得自己可以控制到唔係咁玩，覺得有啲嘢應該唔會發生喺我身上……呢啲咪stupid囉！」

於十一月廿三日在紅館舉行farewell show後，Swing將正式解體。

忍受

Jerald不諱言，從入行到Swing○二年第一次拆夥的日子，他過得很艱苦。「嗰陣我有好多嘢想證明，擺好多時間去做碟同做宣傳，一年要出兩隻碟，又要做好多Jingle，好多嘢做，但係出到嚟好似冇乜人知咁，連我最親嘅親戚、朋友，一直都唔覺我哋做過啲乜，唔知我哋出咗碟，更加留意唔到我哋做過好多訪問——啲訪問做完之後，一係冇出街，一係啲版位細到根本睇唔到！我好唔開心、好冇癮，好似得個做字咁！既然做幕前乜都幫唔到我，咁我不如揀第二條路行啦！我本來會幫個uncle新開嘅公司做project manager，不過最後唔夠水喉，公司開唔成，咁我咪做番幕後，幫人作歌囉。」

然而，他說的那幾年工作這麼多，就算賺不到名，照計也應該賺到利吧！「賺唔到喎！我係一個窮人！我依家收入都唔穩定，但起碼有，叫做好啲！但我九七至○四年嗰七年嚟，我喺錢方面都幾頭痛！好彩我由九七年至○○年，都係住喺個Uncle一個物業度，佢幫我畀咗一年租，雖然之後我都要畀番佢，但當時唔使交租，我已經暫時唔需要為交租而煩；到○○至○二年，我就同我依家嘅太太，租咗個單位住埋一齊；然後好好彩，我喺加拿大嘅屋企人，讓咗香港一個單位畀我哋住到依家。如果我○二年之後仲要交租，我唔會留喺香港咁耐，老早就走咗！以我嘅收入，我根本suffer（忍受）唔到！」

他們說，當初組成Snowman，本來還有陳子聰（中）這位成員。

沉迷

至於Eric，○二年沒有了Swing後，他繼續幹自己喜歡又享受的作曲和音樂工作，每年約出產三十首左右的作品，間中又推出自己的個人Demo碟。○六年，為陳奕迅寫的一首〈夕陽無限好〉，更為他囊括了全港的音樂大獎，成為了他的事業高峰。不過，直到○七年，他卻失足跌進另一個「世界」的深淵，幾乎破壞了所有本來順暢的幕後工作生活！

「○七年，謝霆鋒叫埋我一齊玩隻online game，我都唔知會咁大鑊！連續兩、三年，我玩到日與夜都唔知，試過有三日唔沖涼唔瞓覺唔食嘢，當時我好多鬚根、暴瘦，個人癡癡呆呆咁！之前嘅所有生活完全停頓晒，完全係lost咗！直情係好似啲毒友咁，戒唔甩！

「玩呢個game真係要好有自律嘅人先玩得，但我個人冇乜自律性，我喺屋企做音樂，同打game都係同一部電腦、同一個位，好容易就係咁玩落去！我嗰段時間，我連自己最鍾意做嘅音樂嘅火都冇埋，我一年只係作咗七至八首歌，好彩有首〈囍帖街〉，都叫做有啲版稅收入頂住！不過我後尾都愈嚟愈驚，覺得好唔對路，真係要離開呢個網上世界，結果喺○九年，Jerald打畀我，話想重組Swing，可以話救番我出嚟現實世界！」

重組

○九年Swing復合時，可有想到三年後又再拆夥？Jerald說：「其實當時我已經同太太有晒plan要生BB，三年後要離開香港，我打畀Eric同佢講，想喺走之前重組Swing，出幾張碟，做多個concert收尾，佢一口應承咪做囉！」

Eric又在旁補充：「我同佢講，重組唯一條件，係要大家一齊作曲，唔再好似之前咁一隻碟每人作五首，結果我哋復合後第一張碟《武當》，成為咗我哋最滿意嘅一張碟，最Swing！其實只係玩三年，我覺得OKo架！因為三年嚟，我哋日日都見住面，呢條友真係幾難頂o架！哈哈哈！」

Eric與Grace葉佩雯拍拖至今十年，感情極穩定。

「我個人好煩o架！」Jerald即插嘴。「同一個問題，可以成日問佢幾次！就算我哋之前分開時，我間中都會打畀佢，問佢阿邊個邊個信唔信得過，然後就會傾足幾個鐘！因為佢係我喺呢個圈最信任嘅人！」「係喎！我哋嗰陣真係間唔中會詳談o架！」「其實我係訓練緊你忍耐力呀！你唔見你EQ高咗咩？你之後做幕後，對住啲artist會有更多耐性囉！」「話唔埋，過多幾年你個囡會入行，參加《巨聲》呢！到時我做評判嘅話，我會叫佢返番加拿大囉！哈哈哈！」「我覺得你唔會忍心囉！」（他們的對話，下刪五百字）

OK，兩位兄台，快樂嘅時間過得真係快，又係時候講拜拜！