千禧年喺香港播過嘅動畫《地球防衛企業》，可能冇乜人識，當時譯做《雷霆守護者》，主角機體Dai Duard雖然身為「萬能俠」之列，但非無所不能，唔識飛天遁地不特止，同外星怪物交手拳來腳往，招招膽搏膽，一旦整爛咗市區設施，仲要面對市民投訴、巨額賠償、企業負債等現實問題，一反傳統機械人動畫嘅風格。如今Dai Guard已經現身SR合金系列，豐富裝備重現劇中頂癮出招場面，加埋大大支「人肉打樁機」，邊個話冷門嘢就唔好玩！
格鬥機系扭得誇
嚴格嚟講，Dai Guard嘅造型跟「萬能俠」類別都有四、五成相似，可惜唔會發射飛拳、心口又冇死光，招招只能埋身肉搏，因此SR版本就喺可動性上花足工夫，最驚喜莫過於膊頭關節，預留長達三分一圓周嘅深坑，配合拉出式關節，擺動幅度大到「甩骹」咁款。另外，由於下盤連同雙腳用咗合金炮製，夠晒墜手、硬淨，腳掌跟足踝嘅分件式設計，亦都增加接地性，雙腳點扭都企得穩陣，加埋三節軀體內藏金屬骨架，令小蠻腰都承受到上半身重量，唔怕寒背冇腰骨！
換件擺出招牌甫士
查實Dai Guard又唔係次次作戰都要硬橋硬馬，都會因應戰況換武器，弊在所謂「強勁」武器，喺故事中都有現實嘅使用問題，例如左手換咗鑽頭，但係機體又承受唔到強大拉力，隨時未鑽爆敵人已經手臂報廢。至於故事後段嘅重要武器「人肉打樁機」，SR版亦都做埋，只需將雙手換成強力摩打及打樁機，再將摩打接位插入右前腕打樁機嘅凹位，就擺到劇中注入動力、將長長樁釘貫穿敵人嘅熱血甫士，同《勇者王》Golden Hammer有異曲同工之妙！
查詢：2433 1828（瑞華行）
Alfred
SR超合金《地球防衛企業》Dai Guard
建議零售價：$479
絕招！人肉打樁機！
打樁機前端嘅機械臂部分，可拆除銀色部件嚟換打樁釘。
摩打手拆除拳頭換上插蘇腳，嵌入打樁機就使到必殺技。
早期型Dai Guard以格鬥技對付敵人，後期型就換成左手摩打及右手打樁機。
網槍安裝喺右腕，可透過換件來重現收納及展開形態。
附送兩款唔同造型嘅界震機雷，作引爆之用。
Dai Guard嘅頭冠用硬件製成，易斷又尖，好在有軟膠版本換件。
膊頭有齊拉出式關節及深坑活動位，垂臂動作可以誇張到甩骹咁款。
全身合金成分極高，令Dai Guard腰腳夠力，輕易做到金雞獨立。
留言列表
{{ article.title }}
