娛樂八掛大放送★

日本新一輪速食文化湧到，立食壽司空降香港！從字面解，全間餐廳搵唔到一張凳，要企直嚟食！唔消化？問過醫生，答案係完全「大丈夫」（日文：無問題），仲分分鐘有利健康。我都要諗諗好唔好掉晒屋企啲餐椅。記者：朱崇德　攝影：蔡家輝　Model: Irene@GME

二次大戰後產物

搭過日本 JR都應該見識過車站立食風，拉麪、咖喱飯、壽司幾分鐘上枱，三扒兩撥搞掂一餐！最近呢股風吹入港鐵香港站，以為「天下立食壽司」係一般快餐店？錯！速食得嚟對出品有要求，就算午市繁忙時間，都係接到 Order才由三十年經驗老師傅即席手握，快得嚟都講質素！其業務拓展部經理 Ray更話，立食係健康飲食文化！唔信？問吓醫生囉！

放大圖片

■ 270卡路里低脂壽司套餐$48（天下： 2526 0886）

放大圖片

■ 06年日本動畫大師押井守便以立食為題材拍出諷刺社會的《立 喰師列傳》，可見這文化深入民心。

勞：胃酸難倒流！

食道喺胃之上，如果你要舒舒服服挨住、坐住食，食道無咁直，胃酸易倒流，就好以將水樽打斜放，打瀉水嘅機會就高啲；相對嚟講，立食時食道完全垂直，水向低流，胃酸倒流上食道嘅機會就大大減低。而且立食相對無咁舒適，唔會食得太耐，亦間接食少咗，就唔怕暴飲暴食。要留意嘅反而係喺開放式環境進食，有可能沙塵滾滾連帶有細菌，要多注意衞生問題。

放大圖片

勞：勞永樂醫生

放大圖片

■立食時食道如垂直水樽，坐喺度食，如坐姿不正，就似水樽打斜放，胃酸易倒流。

李：不阻礙消化！ 放大圖片

李：李家仁醫生

立食絕對無問題，對消化完全無影響。食完嘢落到胃起碼需要半小時消化，坐住食只係令你感覺舒適啲，你要企喺度食咪企住食囉，餵奶 BB挨喺度都無問題啦；只係企喺度食容易累，所以就會快啲食完快啲走，呢個係慳地方慳時間同客流量考慮嘅商業決定。食壽司，一啖就放入口，唔似鋸扒要慢慢切慢慢食，就算係飯盒，都大把人企住、踎住食，你話有乜問題先？

港人習慣行住嚟食！

拜形形色色街頭小食所賜，香港人鍾意邊行邊食，咁對健康有無影響？

勞：小心鯁親！ 放大圖片

■趕返工，好多人都會邊咬包邊追車，呢個習慣真係唔要得！

行住食總有原因，趕車又或者趕時間，除非你經常咁做，已經好習慣同好留心，否則好易濁親、鯁親，引致窒息，所以絕對唔建議一路行一路食。

李：小心胃病！

行住食可以接受！只係要考慮雙手乾淨與否，同埋街邊沙塵滾滾嘅問題，又唔係叫你食大餐，只係咬嚿麪包，你話邊個未試過先？不過咁，呢種行為反映生活緊張，生活壓力、節奏會唔會影響個胃，引致胃痛，呢個係另外需要考慮嘅問題。

大肚婆立食　會生痔瘡？

坊間流傳大肚婆下身壓力大，企喺度食嘢會引發痔瘡問題，係真唔係呀？

勞：子宮易下垂！ 放大圖片

■孕婦要適量運動鍛煉胎盤肌肉，減低子宮及其他器官下垂機會。

孕婦胎盤肌肉位置受壓，因為成個 BB係靠呢組肌肉支撐，但係孕婦都無可避免要行要企㗎，為咗補救呢方面問題，孕婦應該做啲運動去鍛煉呢組肌肉，減少子宮及其他器官下垂機會，不過，一次半次立食係無問題嘅。

李：完全無關係！

大肚婆較容易患痔瘡係由於 BB在孕婦體內不斷長大，令子宮受壓，阻礙血液循環，因而導致直腸血液回流較慢，令該部位血管膨脹從而產生痔瘡，同飲食無關！

食飽運動　易盲腸炎？

讀小學老師都有教，食完嘢唔好即刻做運動，唔係就好易盲腸炎，咁又睇吓醫生點講！

勞：加重血液循環負荷！

唔理易唔易有盲腸炎，食飽真係唔應該做運動！因為食飽咗，腸胃要消化，消化就需要血液循環去輔助，咁啲血液照顧得個腸胃嚟，又點夠再分啲去肌肉度俾你跑步用先？所以食飽做運動會令血液循環負荷過重，影響消化之餘，亦影響運動能力。至於盲腸就好似一條倔頭路，好多人一廂情願諗，跑步時會跌咗嘢入去塞住，增加患盲腸炎機會，不過，其實係無好明確嘅證據證明！

李：無醫學根據！ 放大圖片

■食飽之後寧願瞓陣都唔好做運動！

唔贊成食飽後做運動！因為做運動時，血液要運行至肌肉，如果同時間胃部又須要血液將食物嘅營養運行全身，咁就會顧此失彼；至於食飽後做運動會否直接導致盲腸炎，就並未有確切數據證實！

健康飲食習慣小貼士

1.有病都要食飯：老一輩人話有病唔好食飯，因為難消化！勞永樂話完全無理據！生病時仍須能量去加快康復，米飯相對係較易吸收嘅熱量，反而因為放棄主食或減量而令體能更差，令病情惡化，千祈咪制！2.飲食適可而止：香港人講到食，普遍係「需要的不多，想要的太多！」其實每餐唔應該過飽，有啲人嘅概念係：「唔食晒就浪費！」好多媽咪變肥，都係因為細路仔唔食嘅嘢自己食埋。記住，每餐七成飽，慢慢咀嚼，咁就唔怕食得太快唔知飽。


■據講日本立食文化始於二次大戰之後，快捷、慳位、慳時間是其賣點。