楊愛瑾與王宗堯老友鬼鬼,萬聖節將至,兩人結伴試玩駭人鬼屋應節。膽小的楊愛瑾全程拉實王宗堯壯膽,又亂叫為自己定驚。

萬聖節將至,不少人都會「花錢買驚嚇」,到香港海洋公園玩鬼屋被鬼嚇。楊愛瑾(Miki)及王宗堯(Greg)早前相約到公園率先試玩,他倆日光日白去玩鬼屋,理論上驚怕度應會下降,但Miki坦言仍然相當擔心:「我真係好驚玩鬼屋,尋晚驚到瞓得唔好,覺得好似畀公司賣豬仔咁。我陣間玩嘅時候一定要四圍都有人包住我。」Greg聞言後笑指她應帶備「G4」裝備。

唔知嗌乜

的確,Miki在鬼屋內不只捉實Greg,她甚至連記者都不放過,左右手各執一個,前後包圍自己壯膽,雖然有人盾保護,但她依然被鬼屋內的道具嚇得花容失色。在其中一間鬼屋內,Miki要獨自一人滑一條密封的滑梯到下層,而先到下層等待她的工作人員「未見Miki先聽見Miki尖叫聲」,其後問到滑梯內有何恐怖?她說:「乜都冇o架!漆黑一片,我都唔知自己嗌乜。」相反,Greg就非常冷靜及享受玩鬼屋,面對種種好奇機關都會探頭查看,遇到鬼怪又會打招呼、說笑,大大紓緩屋內恐怖氣氛。

自保心得

Miki:「我覺得嚟呢度玩一定要悉心打扮,如果係我會扮南瓜或者靚嘅慈禧太后,咁樣氣氛會好啲,令人分唔清邊個係工作人員同遊客。女仔嚟玩就唔好着高踭鞋,要着波鞋,咁樣畀人嚇都可以走快啲又唔會甩鞋,同埋防止自己畀人嚇到踢死啲工作人員嘛!」

Greg:「如果同一大班朋友嚟玩嘅話,最好搵定啲大膽嘅朋友,咁樣會好玩好多!我都奉勸男仔要着長袖衫,預防畀其他朋友,特別係女仔抓損晒隻手。佢哋驚起上嚟真係估唔到佢哋會做啲乜!而要打扮嘅話,我會扮成電影《猛鬼街》嘅Freddy Kruege。」

影視組

Miki與Greg探鬼屋,嚇到o依嘩鬼叫。

Miki拉實Greg,一步一驚心。

Miki玩滑梯全程尖叫,但又唔知自己嗌乜。

Miki

Greg

點評鬼屋

 

最多變化 亡魂棺廠

驚嚇度:9 好玩度:9

Miki與Greg推介之選!該鬼屋實施單獨體驗,每次只准一個人完成旅程,倍增恐怖感。屋內的滑梯更增加空間感,Miki說:「呢個係最好玩!間屋一時光一時黑,好有變化。而且屋內仲有滑梯,好有創意。」

最精心布置 清宮殘異錄

驚嚇度:9 好玩度:7

以中國紫禁城為背景的鬼屋,屋內布置以慈禧太后作中心,有荷花池、後花園等等。Miki都大讚屋內裝飾華麗:「佢哋個布置好精密好靚,再加上聲音效果,好似腳步聲嗰啲,真係令人驚好多。」

最有創意 3D噩夢潛行

驚嚇度:7 好玩度:8

全港首創的3D幽閉密室,在地下及牆上放出3D嚇人影像,客人戴上3D眼鏡後猶如置身於一個恐怖的動畫鬼世界。Miki與Greg認為製作認真,有創意、有心思!尤其是當中一幕跳樓的景象,地下的影像真的幾可亂真!

最搞笑演員 腥級片場

驚嚇度:6 好玩度:7

屋內以經典的恐怖電影作主題,著名恐怖片人物如貞子、鬼娃娃花子亦會隨時靠近嚇人!不過當中以演員「肥導演」最為人津津樂道,Greg說:「佢個造型好特別,佢自己亦都好入戲。有佢喺度會冇咁緊張,因為佢好幽默。」

 

 

 

 

 

arrow
arrow
    文章標籤
    楊愛瑾 遊 鬼屋 奪命 狂嘩
    全站熱搜

    stacylife 發表在 痞客邦 留言(0) 人氣()