K4中以中女樂瞳同宅男朱敏翰最多人講，樂瞳說：「估唔到因為呢套劇多咗人識我，希望因為入到屋可以多啲機會唱歌。」似乎中女歌星夢仲未發完喎！
K4救亡做臨記 反枱一劇演三角
無綫鬧臨記荒，連 K4三子都要被吹雞頂住，除 K4外，於同劇有份做思春學生妹 Yumi嘅蔣家旻亦一樣要被召做老臨，係得中女樂瞳咁大支話要考慮吓啫！
唔做老臨
無綫近日同臨時演員中介公司起衝突，八家合作開的中介公司拒絕提供老臨，令無綫有明星冇臨記，惟有急召三線藝員及訓練班學員救亡，連 K4三子也被徵召扮路人扮卒仔。
其中黃得生（反枱）和羅鈞滿（囂屎）在《回到三國》本身飾演劉備家丁，轉頭又變蜀國士兵同孫權卒仔、翌日就化身曹軍小兵，自己打自己，新仔焗住踩到甩轆，但做開三線女角嘅樂瞳就話：「無綫都有同我提過吓，我家做緊兒童節目，一個星期要返去拍一日，我仲有好多訪問做，我諗冇時間做臨記嘞，不過如果真係好急嘅咪考慮吓做囉。」話明急仲要等你阿姐考慮吓，死得啦！
無綫老臨 39蚊招標
香港由五月一日起實施最低工資條例後，有指無綫拒絕與八間臨時演員中介公司簽長約， TVB更突然刊登招標廣告，似有意飛起合作開的中介公司，惹起八大老臨公司不滿，拒接無綫通告。
據知情人士透露， TVB為及早解決問題，曾會晤一名叫巧兒的中間人，希望跟臨記公司洽商，但有傳 TVB就要求：「有冇可能時薪低啲？」但後來發現冇彎轉，於是將招標薪金調整至每 8小時 310元，即每小時約 39元，超時補水每個鐘 42元；其他非戲劇類則每 6小時 250元，即每小時約 42元，但最後中標者開出乜嘢條件，就要到本週五（ 13日）截標後才知曉。
古裝劇《回到三國》因需要大量臨時演員，被迫動用幕後人員甚至監製、導演上陣；更貼出通告，歡迎藝員家屬及朋友應徵當臨記，薪酬每 6小時 180元，加鐘就時薪 28元，令一眾市民有機會入電視城睇明星。
臨記辛酸
做 TVB臨記最低工資實施前，臨記時薪只得 19元，咪以為騎呢待遇喺周星馳電影先會發生，現實分分鐘慘過戲。
做埋苦力
臨記埋位前除咗日曬雨淋冇人理外，有時要幫手擔擔抬抬搬道具，收人工唔只做路人甲，仲要做埋苦力。
排隊歧視
電視城有接駁巴士出市區，藝員、工作人員同臨記都搭得，但臨記要排另一條隊，等藝員同工作人員上晒車至輪到佢哋，冇位上唔該等下架，咁算唔算歧視呢？
御用劊子手
外形突出的臨記有時會受「眷顧」，例如這位花名叫「大嚿」的臨時演員，因為體格魁梧，劊子手的角色都會找他來演，薪酬每 8小時 350元，即每小時約 44元，人大嚿連錢都大嚿啲！
留言列表
{{ article.title }}
