杜如風 孖 Hardpack 反轉 旺角
踩入 MK亂搞
上週四（ 10日）， Hardpack再孖杜如風為本刊踩入旺角西洋菜街行人專用區亂搞，其間訪問街坊， 10個有 9個話加煙稅太重。
上圖左起：
Joseph
結他手，現主力開班教結他。
杜如風
MV中免費飾演記者，佢話：「講心唔講金，最緊要開心。」
Adam
音樂監製，阿媽係容祖兒歌唱老師 Christine Samson。
Kevin仔
LMF鼓手，現任《勁歌金曲》 band leader。
基仔
係方大同御用 Bass手，早前於梁詠琪演唱會中彈 Bass。
咪睇今次 Hardpack MV造型搞笑就以為齋玩，其實佢哋每位成員個個堅有音樂底，玩開 rock，又同阿 Paul、何超儀等人係老死，唱另類嘢仲未死得，原來有 friend撐住！
超儀夠雷
Hardpack成員同何超好 friend，何超有騷例搵佢哋幫手，鼓手 Kevin仔話：「我同何超有隊 band夾緊，佢好支持 band sound，佢真係冇架子 o架，係好太太。」《蘋果日報》圖片
Hardpack好火氣勁插財爺，查實佢哋待人接物勁客氣，喺澳洲回流滿口英文，又喺無綫做 band leader嘅結他手 Kevin仔說：「老土講句，呢個年代一樣要有道義，好似阿 Paul（黃貫中）同梁翹柏（王菲演唱會音樂總監）等都幫過我哋，成日有 job都預埋我哋一份。做人要有義氣，邊個幫過自己一定會記得，正所謂種花得花嘛！好似何超儀咁，我識咗佢 10年啦，佢份人一啲架子都冇，仲好雷，同佢做音樂好開心。雖然我哋鬧政府，不過其實我哋好謙虛嘅，今次真係覺得預算案好唔掂先要爆粗唱佢啫！」
Hardpack唱開 rock，去年同吳雨霏 Kary合唱〈絕配〉上埋優秀選攞獎，不過 Hardpack就話：「我哋冇大唱片公司撐，但係我哋做嘢好用心，我哋對得住自己，唔似啲人上台講一套，落台就走去蒲，咁樣唔掂 o架。」咦？你哋鬧緊邊個先？
當街借煙
踩入 MK搞搞震，杜如風同成員 Kevin仔做街訪，其間佢同一名 MK友當街借煙煲，想睇足本即 click入《 FACE》官網睇。
遊行拍 MV
早前萬人上街反對「史上最廢預算案」， Hardpack乘機扮鬼扮馬趁墟冚拍埋新歌〈加價熱潮吹遍香港〉 MV，條片上週五（ 11日）上載一日已經有近 2萬人睇過， Hardpack成員 Kevin仔話：「我哋原意都係遊行 o架，拍 MV係順便啫。」
阿 Paul扮路人
MV中除咗 Hardpack成員外，仲有杜如風客串做新聞主播直擊遊行，而阿 Paul亦扮路過爆咗句：「乜咁爛口 o架！」
Hardpack孖 Kary攞獎
Hardpack家陣有 4名成員，但期間亦換過好多人，連前 LMF、現 24味成員阿肥都夾過 Hardpack，不過最為人熟悉係去年同吳雨霏 Kary一齊合作出過隻碟《合＋歡》，仲憑〈絕配〉齊齊喺去年 12月上過《勁歌優秀選》攞金曲獎，地下 band都入到屋。
網上 rapper都鬧
財爺一句派$6,000，唔單只順唔到市民條氣，仲激起民憤。現年 25歲嘅網上 rapper Arho Sunny就喺宣布派錢當晚（上月 24日）， upload咗一隻自己創作嘅〈放水 6千〉擺上 YouTube，句句到肉。原來 Sunny 15歲已經開始玩 rap，仲簽咗畀農夫舊公司「催化行動」， 17歲就出第一隻碟，但最後都係想搞自己嘅製作而冇續簽。現時做平面設計師嘅 Sunny說：「總之我一睇唔過眼就會 rap，唔好以為過到骨就算！」
〈放水 6千〉擺上 YouTube兩星期已多達 18萬點擊率， Sunny話：「都係講自己心聲，政府派 6千蚊不如拎去幫窮人啦！」
留言列表
{{ article.title }}
