英皇春茗當晚,楊受成經常陪住新加盟嘅林欣彤,更介紹佢畀其他嘉賓識,錫到佢燶。《蘋果日報》圖片

一如本刊所料,英皇向無綫開價 400萬簽林欣彤 4年,雖然經理人合約要同無綫共同擁有,不過林欣彤身為新一代小巨肺,而且騷價急升至 8萬,點計條數英皇都有賺。

 

放大圖片

自從做咗《超級巨聲》冠軍,林欣彤接 job接到冇停手,騷價更十級跳升至 8萬,直迫周秀娜。

 

男友照住

林欣彤隨時幫公司搵大錢,相反曾經係貨車界女神的 Yumiko則愈撈愈霉,除咗兩度失手露股又露點爆互聯網,自 08年至今一直冇出過碟,上年更被放逐到內地拍劇,放棄香港市場。
本來有得賺人仔算唔錯,弊在 Yumiko又眼紅香港市場比其他小花蠶食。據知 Yumiko嫌英皇冇盡力捧佢,最近更與拍拖 6年的富貴化妝師男友 Andy(梁學儲)唱雙簧呻爆英皇。「 Yumiko同公司仲有幾個月就約滿,本來續約件事都仲有得傾,點知佢好衰唔衰周圍同人呻,又話公司唔錫佢、唔肯使錢落佢身上,儲哥( Andy)仲話『 Yumiko唔使靠英皇,幾個月後我做佢經理人,肯定仲掂啦!』件事傳番落楊生耳中,佢梗係嬲 Yumiko唔聽話啦!」知情人士透露。

 

放大圖片

做布景板
Yumiko當晚冇得坐主家席,全晚淨係黐住詩雅(後右二)同張致恆(前左一)等二線。

 
放大圖片

有米男友
Yumiko同化妝師男友 Andy感情穩定,現於月租 6萬嘅西貢松濤苑同居, Yumiko亦經常揸男友部 50萬 Audi TT代步,唔憂喎!

 
放大圖片

老豆贊助
Yumiko對上一隻唱片《精彩年代》已經係 08年嘅事,而鄭父(上圖左)據知一直有出力支持愛女出碟,可惜 Yumiko撈極唔起。《忽然 1周》圖片

 

阿嬌借歪

難得花成 4百萬將小巨肺搶到手,據知楊受成打算泵水千萬捧林欣彤上一線。
「楊生上星期突然召開秘密會議,講到明今年會將所有資源投放落阿 Mag身上,仲會開戲畀佢拍,至於泳兒同 Sherman(鍾舒漫)唔會有碟出,連阿嬌都會集中火力返內地拍劇。除阿 Mag外,只有阿 Sa同祖兒繼續歌影雙線發展,其他女諗都唔使諗!」
公司開行水喉力谷,不過林欣彤似乎仲未知英皇有幾錫佢,「其實簽英皇都係無綫揀,我唔清楚簽咗幾年同埋有幾多錢,我淨係想做我鍾意嘅音樂就得喇!」
細路女乜都唔知冇所謂,慢慢你就學識英皇宮心計喇。

鍾舒漫:唔會瓜分我嘅資源

楊受成一向聽晒容祖兒話,林欣彤有得入宮,都係多得一姐睇起。而同祖兒唔多啱嘴形嘅泳兒同鍾舒漫就慘成犧牲品,不過 Sherman週一回應時表示未驚過,「阿 Mag加盟唔會瓜分我嘅資源,至於 Yumiko唔續約,我冇聽過,亦冇同佢聯絡。」

arrow
arrow
    全站熱搜

    stinglife 發表在 痞客邦 留言(0) 人氣()