孖住走
由於新竇未曝光，崔建邦在下午 4時許與郭思琳齊齊落樓。飲到大醉玩完一晚的郭思琳則以大黑超遮樣，不過依然以低胸背心誘邦邦。
2010年10月29日
江山易改，劣品難移。崔建邦年初涉毆打女友鄺敏慧，因雙方同意和解，崔建邦得以甩身，只需守行為一年。以為從此生性做人，但在周二（ 26日），崔建邦再被爆因醉駕被捕。
賤男本色一不離二，本刊發現收入大減的崔建邦，原來近日已秘密由畢架山豪宅搬往平三分之二租的西貢村屋。但窮心未盡色心又起，呢頭在新竇與女友唐詩詠癡纏，轉頭竟瞞着正印，偷偷帶有翻版李嘉欣之稱的索模郭思琳返新竇過夜。
散打王變散餐王，就連多次出口維護崔建邦的唐詩詠，事後從記者手上看完照片，亦心死說：「我唔會再樁個頭埋去。」死性不改，崔健邦愛情、事業再次一鋪清袋。
崔建邦醉駕被捕再惹官非，為挽救所剩無幾的形象，報道出街當日（ 27日）他慌忙在 TVB開記招交代事情，更在眾人面前懺悔：「我覺得好後悔，真係承諾以後都唔會。」縱使在記招上七情上面扮死狗，但私底下崔建邦除了醉駕外，私生活原來一樣極盡荒淫。
拖手
下午 3時許，本刊記者發現唐詩詠駕着自己的福士甲蟲車到達崔建邦新屋。入屋不久，換了件白 T恤的唐就與崔拖住手一同坐在梳化睇電視。當時崔母亦在廚房，看來在崔母心目中，唐就是個仔的正印女友。
新竇變砲房
崔建邦自年初涉打女友鄺敏慧（中巴）後，形象、事業一直插水， 6月時更直認經濟拮据。為慳錢，除了將大咬的 Audi戰車賣掉，換了架樸實 Mini外，原來他在月初更秘密搬竇，由以往月租三萬蚊的畢架山花園，搬到月租只需八千蚊的西貢龍蝦灣村屋。
因打女惹禍，早前誓神劈願表示「見過鬼怕黑」的崔建邦，講明唔再花心專心事業，兩個月前才被本刊踢爆已成功翻箍唐詩詠，誰知賤男濫交本色火速現形。本刊收到消息，崔建邦成功箝實唐詩詠後，竟然偷偷在一個月前與 starz people索模郭思琳搭上。
18日，崔建邦駕駛着自己的 Mini Cooper載郭思琳離開後，隨即趕入 TVB出席台慶亮燈儀式。當時唐詩詠亦在場，不過相信她估都估唔到，崔剛與索模在新屋共度一宵。
索摸過夜換衫
上周一（ 18日）下午三點，本刊發現打大赤肋的崔建邦，在新竇露台取熨衫板到廳內。同一時間，記者見到着住白色緊身背心的郭思琳，從睡房中步出。頭髮蓬鬆的她，隨意用橡筋箍將頭髮紥成馬尾，似剛睡醒不久。
當崔建邦熨完衫後，郭思琳在崔面前毫不避忌脫下上衣，換上黑色 deep V背心。由此看來，二人關係異常親密。由於無綫當晚舉行台慶亮燈儀式，校啱時間的崔建邦，接近五點便與郭思琳雙雙離開寓所。
現場所見，與崔建邦過完一晚的郭思琳，腳步浮浮，雙眼浮腫，顯得極度疲憊，相反食飽散餐的崔建邦，在台慶當晚，嘴角一直笑意吟吟，春風滿面。
新竇拖實唐詩詠
事隔幾日（ 23日），精力旺盛的崔建邦，慾火再度上升，急 call正印唐詩詠上新竇。唐還換上男友白色 T恤在屋內睇電視，之後二人更在睡房由晏晝兩點玩到傍晚六點。當時崔建邦的媽咪一直在內，明顯她對唐詩詠上門見慣不怪。至晚上八點唐詩詠便駕其甲蟲車離開，返回電視城拍攝新劇《真相》。
崔建邦多次有偷食紀錄，但唐詩詠對他依然不離不棄。據知，全因崔每次犯錯後，都會刻意在唐面前洗心革面，扮乖戒蒲。同時吼準唐詩詠耳仔軟性格，每每在女方失意時，顯出無限關懷，令唐對他泥足深陷，無法自拔。
知情人說：「 Amigo（崔建邦）唔係靚仔，不過就好識捉女仔心態。佢成日喺女仔面前扮弱者，最鍾意飲醉酒之後，講到自己幾咁懷才不遇，冇人關心佢，只有對方先至幫到佢重新做人，其實咪玩手段博女仔同情囉！好似 Natalie（唐詩詠）咁，佢呢幾年唔係冇人追，但就衰耳仔軟，成日覺得 Amigo只係一時做錯，認為可以憑自己去拯救呢個男人。而 Amigo又好識睇時機，之前 Natalie媽咪過身，當時佢哋兩個已經分咗手，但 Amigo就請埋大假去安慰 Natalie。我哋都勸過 Natalie好多次，叫佢擘大眼睇清呢個人，不過佢話我哋唔會明。」
崔母認唐詩詠為正印
上周六（ 23日），唐詩詠在崔建邦新屋小睡近 3小時期間，崔母剛巧在場，對兩人親密舉動明顯見慣不怪。相信崔母心目中，只知道唐詩詠是自己個仔的女友。
唐詩詠心死：唔會樁個頭埋去。
本周一（ 25日），記者在無綫電視城向唐詩詠問到崔建邦一腳踏兩船一事，起初她故作鎮定說：「無論你影到乜嘢，佢都係我好朋友，一個屋企人！」但她被再三問到有否被騙感覺，她則無奈說：「放心，我唔會樁個頭埋去！」
「唔會理其他人點睇」
一次不忠，百次不容。周一（ 25日），當記者拿出相片，踢爆崔建邦再次偷食時，唐詩詠亦由最初的執迷盲目，到最後忍唔住爆咗句：「我唔會再樁個頭埋去」，終於肯開眼望清賤男。
記：我哋影到你同崔建邦喺西貢間新屋入面，你哋拍番拖？
唐：呢個問題，我都答過好多次。我只可以講佢係我好朋友、一個屋企人，見面都好正常。
記：朋友會瞓埋一齊，同埋拖手嘅咩？
唐（淡淡然）說：無論你哋影到我同佢做乜都好，我亦唔會理其他人點睇，總之我同佢係好好嘅朋友。
記：係咪影到你哋做乜都唔會認？
唐：都係嗰句，真係想保留一個我同佢嘅空間。
記：佢之前咁花心，覺唔覺自己對呢段感情好盲目，前世欠咗佢？
唐：做朋友其實唔需要睇佢花唔花心。
記者隨即將崔建邦偷食相給唐詩詠睇。
記：你識唔識呢個女仔？
唐（停頓幾秒）：唔識。
記：佢前幾晚上咗崔建邦屋企過夜！
唐（口窒窒）：咁……佢（ Amigo）都係正常人，都應該有佢嘅正常社交。
記：但係個女仔喺佢屋企換衫喎？你會唔會對崔建邦重新估計？
唐（忽然轉口風）：其實我對佢已經放低咗，係你哋未放低，有段時間我承認好嬲佢，不過呢啲係之前嘅事。
記：其實你知唔知你身邊朋友、屋企人都好擔心你，驚你俾人呃？
唐（乾笑兩聲）：你哋放心喎，我都想同大家講唔使擔心，我唔會再樁個頭埋去。哈哈，總之我會快過佢（崔建邦）搵男朋友啦！
醉駕不特止，周三（ 27日）本刊發現崔建邦在揸車返回電視城途中，竟在車內拎住電話傾偈，罔顧安全。
郭思琳：飲醉過夜好平常！
本刊斷正崔建邦帶索模郭思琳返家過夜後，周二（ 26日），記者致電郭思琳，對此她直認不諱，更表示「飲醉過夜好平常」，夠晒 open！
記：我哋影到你上崔建邦屋企過夜？
郭：咁之前成班 friend上佢屋企食飯，我飲醉咗咪留喺佢屋企囉，好平常啫！
記：咁你哋有冇發生關係？
郭：冇，我酒醉都有三分醒，肯定冇俾人搞過！
記：會唔會係你飲得太多「斷片」？
郭：冇嘅……應該冇嘅。
記：你知唔知崔建邦同緊唐詩詠一齊？
郭：唔知喎！係嘅話，你哋應該要問吓唐小姐會唔會嬲！
至於偷食斷正的崔建邦，周三（ 27日）在電視城開記招為醉駕解話後，本刊記者再向他追問。崔有備而來說：「佢（郭思琳）係朋友嚟，之前一晚成班人喺我屋企 gathering，我哋冇嘢 o架！（冇嘢點解會過夜？）佢飲大咗，所以咪喺度瞓囉！（佢喺你面前換衫喎？）吓！我見唔到喎！（驚唔驚唐詩詠嬲？）佢點會嬲，我哋係好朋友嚟之嘛！」偷食斷到正，崔建邦錯的對不了！
寓所降呢
崔建邦早年成為陳志雲愛將後，工作密密接，自始毫不吝嗇，以月租三萬元進駐九龍塘豪宅畢架山花園高層單位。不過隨着他發生打女友鄺敏慧事件後，人氣下滑兼零工作，他惟有馬死落地行，近月改住 8千蚊租的西貢龍蝦灣的 2樓 700呎村屋，冇天台冇花園，座駕更可在空地任泊，實在慳番唔少。
屢傳整容落選港姐
今年 23歲的郭思琳，於 02年即 15歲時入行，擔任報章雜誌和廣告模特兒。成年後，她隨即秘密為 now收費電視台成人台主持節目。 07年她簽約成為蕭定一旗下藝人，有網民就立即踢爆她整容，數月後她參選香港小姐，當時傳媒封她為「翻版李嘉欣」，可惜經初次面試後便被 out。同年 9月，她有感外界把蕭定一旗下藝人與整容扯上關係，故由新公司支付七位數字提出解約，不過至今的工作量依然不多。
起得快跌得快
31歲的崔建邦，少年時曾向拳擊總會榮譽主席徐家傑拜師學藝，試過參加散打比賽獲得六連冠，於是有「散打王」稱號。崔於 20歲時開始做 DJ，更一度被無綫力捧，可惜他嗜杯中物，兩度醉酒鬧事，搞到事業起完再跌。
風光期
崔建邦早年在港台任兼職助理時認識陳志雲。 05年順理成章成為 TVB合約藝員，之後與唐詩詠合作《 K-100》撻着。在陳生關照下，崔出道不久就擔任《萬千星輝賀台慶》等多個大騷司儀， 07年獲得「飛躍進步男藝員」。風頭一時無兩，更有傳他間接逼走與他路線相同的王賢誌。
折墮期
09年底 o靚模鄺敏慧（中巴）報警聲稱被男友崔建邦襲擊，鄺更在傳媒面前聲淚俱下數臭崔，加上有指他背住唐詩詠暗溝中巴，令人氣急挫，所有主持工作被飛。到 10月 3日，陳志雲又因涉嫌貪污而被捕，在冇人撐情況下，崔建邦踎躉數月。
翻生期
霉足半年，崔建邦於 6月終獲 TVB解封，亮相《獎門人》，之後亦復職做番《勁歌金曲》、《今日 VIP》主持。 7月他被本刊拍得駕車到唐詩詠寓所，二人翻撻成功，崔為了女方亦痛改前非，戒蒲戒滾。
散餐期
可惜蒲癮滾癮只戒甩三個月又再死灰復燃。本周三（ 27日）有報道指崔醉駕被捕，同時又被本刊斷正秘搬新竇不特止，更一周內嘆完郭思琳再口卓唐詩詠，賤男食散餐行為令人髮指。
留言列表
{{ article.title }}
