婚宴開拖吳君如鬧陳小春：票房毒藥壹週刊 1066期 @ 娛樂八掛大放送★

右：正毒藥！（《FACE》圖片）
左：話你自己呀！（設計對白）（《忽然1周》圖片）

上月廿八日，吳彥祖（Daniel）和Lisa S在香港補擺喜酒，到馬會包場舉行派對廣邀圈中人出席。原本普天同慶，但臨散席，有指陳小春和吳君如大動肝火互相指罵，翌日陳小春在微博上以「TMD」（即：他媽的）爆粗鬧吳姓女前輩「不知所謂」，矛頭直指吳君如。
據了解，因拍《十月圍城》而鬧不和的陳可辛和陳德森，近日因搶拍相同題材再起衝突，當晚兩杯到肚的吳君如，見老公死對頭陳德森在場，上前破口大罵，負責勸交的陳小春，反被吳君如鬧到狗血淋頭。

拍檔變冤家
當晚從秘道進入婚宴會場的吳君如，在場內滿場飛，直到婚宴尾聲，一班圈中人仲未玩夠，拉住一對新人繼續隊酒。據了解，已飲大兩杯的吳君如，見到同場的陳德森，即衝口而出說：「你搶嘢做。」
跟陳德森老友的陳小春見狀，即上前勸阻，點知吳君如連小春都鬧埋，令近年收晒火的小春即時着燈：「你老公嘅戲俾我都唔拍。」愈講愈勞嘈的君如還拖反駁：「你啲咁嘅毒藥（指票房毒藥）搵你都風中轉。」令在場的主人家吳彥祖，一時間不知所措。
由於兩人嘈得激烈，在場賓客紛紛走埋去睇熱鬧，應采兒見狀，便和陳德森拉走老公免搞寸party。翌日，怒火未消的小春，在微博留言炮轟：「昨晚Party好甜美……但也碰到一位姓吳的，四個字送給她『不知所謂』還說前輩TMD」。

鬧雙胞
至於吳君如酒後潑婦罵街，原來係幫老公出番啖氣。事緣去年拍攝《十月圍城》期間，監製陳可辛與導演陳德森意見分歧，陳德森一度劈炮離開劇組，情急下陳可辛只好找來劉偉強幫手埋尾。今年四月，《十》片在電影金像獎中獲八個獎項，當中陳德森得「最佳導演」獎，陳可辛還不計前嫌公開讚他實至名歸。
事實上，兩人只是面和心不和，自成為金像導演後，陳德森事業再現起色。曾以高價買入邵氏舊片倉的天映娛樂公司，四月中宣布跟陳德森合作，開拍兩部大製作，其中一部是翻拍張徹執導的《獨臂刀》。
另一邊廂，陳可辛同樣計劃拍《獨》片，但因版權屬天映娛樂，只好開拍以《獨》片為藍本的《武俠》，找甄子丹、金城武和湯唯主演。原本《武》片搶先在本月初開鏡，有指主要投資方Andrew Morgan和陳可辛因錢銀問題引起爭拗，撤走資金，令《武》片差點胎死腹中，直至最近才找到內地的星美公司投資開拍。
四圍頻撲搵老細，陳可辛為此心力交瘁，戥老公心痛的吳君如，見到陳德森EQ即時失控。事後小春被追問事件起因，答案充滿弦外之音：「我點敢得罪大導演老婆呀。」

得罪人多
衰多口的吳君如，經常失控亂噏而得罪人，不論前輩和國寶，都無一倖免。
侮辱國寶
08奧運，欄王劉翔因腳傷退出比賽，當時吳君如主持商台節目《嘩嘩嘩！打到嚟！》居然口出狂言：「佢嗰日跑係咪食咗屎？」拍檔谷德昭馬上幫手打圓場，面皮成尺厚的吳君如繼續講：「我唔應該侮辱呢個國寶！」事後遭網民群起狂轟。
梅姐決裂
01年劉德華、梅艷芳和吳君如合作拍《愛君如夢》，由華仔出面找阿梅做女主角，拍攝後期有指君如搶戲，令梅姐淪為配角，加上主題曲原先由華仔、阿梅合唱，忽然加入吳君如變三重唱，令阿梅非常不滿，缺席電影宣傳，與君如反面。其後有阿梅fans在網上留言，指阿梅被華仔出賣。

火爆難改
陳小春天生性格火爆，躁狂事例多到數唔晒，但自從與應采兒翻撻，已經收晒火，更於今年拉埋天窗，果然一物治一物。
夜店動粗
08年萬聖節當晚，小春與應采兒到蘭桂坊夜蒲消遣，其間遇上扮鬼嚇人的老外騷擾，兩杯到肚的小春睥實對方，加上有身體碰撞，小春即時發火，與對方大打出手，應采兒及男友人見狀，強行拉小春離場。
打記者
當時與霆鋒、栢芝三角戀糾纏不清，小春試過不滿被追訪搶走記者攝錄機，遭警方帶返警署助查，又試過有記者因為衝入小春大埔康樂園車房拍照，令他大動肝火，出手「叉頸」動粗。
強出頭
曾與張栢芝拍拖的陳小春，08年因舊愛被捲入淫照事件，他忍不住火滾爆粗，暗寸避走美國的陳冠希。

吳彥祖和Lisa S上月尾補擺喜酒，怎料婚宴尾聲君如和小春起衝突，據知身為主人家的他，唔想得失兩方，未有上前勸交。