你先係真正Honey!(設計對白)
使乜講!(設計對白)

去年底跟拍拖四年多的李詩韻分手,鄧健泓聲稱自己一直冇拖拍,但快樂。咪信佢!其實甩拖唔夠四個月,鄧健泓已經跟「四葉女」出身的龔嘉欣,因為合作電視劇《隔離七日情》撻着,不單齊齊搬入深井風水屋苑碧堤半島,上月更飛泰國,平玩火辣二人世界。

呆等四粒鐘
上週二(七月十三日)下午一時,頭戴cap帽的鄧健泓,揸住Mini Cooper由屋企出發返電視城,在公司逗留三粒鐘,再過海到大坑中華游樂會,由於附近無錶位泊車,他索性停埋一邊,在車內呆坐四粒鐘,其間只有落車到對面街便利店買飲品。
由朝等到晚,晚上八時,新歡終於出現,頭戴草帽冇化妝,身穿T恤短褲的龔嘉欣隨即跳上車,之後再駛到銅鑼灣世貿中心停車場。唔想新戀情見光,女方全程用草帽遮住上半邊面,鄧健泓則機警地左望右望,之後直達四樓的Rice Paper越南餐廳撐枱腳,食足個半鐘才前後腳離開餐廳。

住風水屋
食飽飯,二人過海往旺角方向駛去,當發現有記者,鄧健泓表現驚青,即時加快速度,不單衝紅燈,更在雙白線切線,擾攘至十一時,鄧健泓最終成功「棄女」,獨自揸車返回碧堤半島。
「鄧健泓住第二座,好多時朝早會見到佢哋(鄧、龔)搭[車立]去L8(停車場)攞車,不過兩個好避忌,喺[車立]度唔會傾偈,女嘅成日頭耷耷,好似好驚俾人認到咁。」碧堤住客爆料說。

泰國度假
扮單身的鄧健泓,四月初開拍電視劇《隔離七日情》時,已經[目及]中龔嘉欣,除將自己的新歌交俾女方率先聽,知道對方鍾意狗,他便投其所好,講狗經搵機會埋身。氹女有一手,新目標好快就到手,龔嘉欣更索性搬入鄧健泓的風水屋同居。上月尾《隔》劇煞科,據知二人趁空檔,齊飛泰國享受陽光海灘。
度假回港後,龔嘉欣在「微博」透露拍拖旅行的心情:「今天的好陽光,令我想起旅行的陽光海灘……」上個月,鄧健泓推出個人大碟,龔嘉欣繼續發功,利用「微博」賣廣告氹男友開心:「鄧先生 我偷走了去買你的唱片 現在被抓回來,大家都支持Patrick(鄧健泓)……」
見過鬼怕黑,過去跟圈中人拍拖都冇好結果的鄧健泓,堅持玩地下情,就算女朋友公開「示愛」,他在「微博」回應亦十分謹慎:「一雙一對 一尖一圓 一凸一凹 一硬一軟 才是雙雙對對」,九唔搭八。

戲假情真
雖然Honey陳志雲失勢,但鄧健泓(Patrick)仍然有劇拍,甚至一次又一次與同劇對手日久生情,Patrick生命字典中,絕對冇「dry」字。

原子鏸
拍攝《男親女愛》撻着,拍拖四年分手,但二人再見亦是朋友,○七年Patrick憑遊戲節目《味分高下》翻身,有機會再出唱片,原子鏸特意錄下恭賀片段鼓勵,表示會與愛犬Sedh齊齊支持他。看到片段時,Patrick一時感觸,當眾流下男兒淚。

李詩韻
○四年拍《老婆大人》撻着,劇中二人奉旨打情罵俏,其後多次被記者影到出雙入對,同車兼同居。去年底李詩韻赴加國完成學位後宣布單身,Patrick亦默認結束了與女方近五年的戀情。

 


四點等到夜晚八點,鄧健泓在大坑等女友做完嘢,做司機到銅鑼灣撐枱腳。


撐完枱腳,龔嘉欣跟鄧健泓到旺角,不過發現有記者追訪,未有跟女友齊返屋企。


等[車立]期間,鄧健泓忍唔住伸手攬女友條腰。


「四葉女」出身的龔嘉欣,初出道時著三點式泳衣拍戲,信心十足。


龔嘉欣在「微博」幫男友宣傳新唱片,泰國度假回港,又在「微博」上載風景相,大晒幸福。


鄧健泓早前拍新歌MV,家中的愛犬史露維又有份出鏡。


鄧健泓愛低調,在「微博」中透露一雙一對愛情觀,不過冇話邊個講。


原子鏸


李詩韻

arrow
arrow
    全站熱搜

    stinglife 發表在 痞客邦 留言(0) 人氣()