以前就話紋身是蠱惑仔專利，但近年明星效應，唔少少男少女、甚至專業人士都會紋番一兩個喺身上留念。而且紋身不再局限指定圖案， 80後紋身潮流是自己設計圖案自己話事，紋身搖身一變成潮流象徵。喂，你今日紋咗未呀？記者：林佩婷攝影：伍慶泉、楊錦文
主攻中國書法 放大圖片 
■訪問期間在紋身的關小姐話從 facebook口碑找到 Joey，網上讚她細心，一個圖案傾好多次才拍板。
年紀輕輕的 Joey是行內少見的女紋身師，本身學設計、曾做化妝師的她，願望是將 Body Painting變成紋身永留作品，最後決定做一個紋身師，更到泰國、德國、瑞士等地拜師學藝，回港後以中國書法字體風格在紋身界中佔一席位。「本身畫畫都好鍾意柔和線條，去到歐洲啲師傅話中國風喺外國好吃香，呢句話啟發咗我利用中國書法技術去設計圖案，自成一格。」最初字體全由 Joey自己研發，後來索性搵個書法老師教，希望令自己字體設計更進一步。
開店四年， Joey和不少客人建立關係，更在香港打出名堂，但她說其實港人對紋身仍停留在以前的觀念，時至今日仍帶歧視，「喺外國好似新西蘭，紋身有文化傳統、歷史背景，啲人紋身紋到臉上都會有人尊重。但喺香港就有負面形象，好似我當年搵舖，人哋一聽開紋身店就話唔租；好辛苦租到舖，又唔俾你放啲相喺出面，住客又投訴啲相嚇人；甚至連申請銀行卡機都係唔批。」雖然受到白眼，但 Joey一點都沒放棄，最近目標就是希望到歐洲嘗試執業，甚至參加紋身展。
放大圖片 
2.第一個試用淡色紋的唐卡，令顏料更貼皮膚，效果相當成功。
放大圖片 
3.Joey對自己腿上紋身最滿意，由北京師傅用掃描手法紋出來。
一個紋身一個故事 放大圖片 
4.09年全運會 BMX越野賽獲銅牌的 Alex，心口紋上父母和妹妹姓和名。
講起紋身潮流， Joey話 80年代仲好興蠱惑仔圖案，約十年前就吹起荊棘、近年 Old School同日式風，而且圖案都變細咗。無論外邊的風格如何變， Joey說最怕紋身好似倒模咁。「我唔想啲客求求其其揀個圖案就紋上身，當初揀中環開舖都係諗住客源係專業人士，佢哋諗到概念我再幫手設計。我唔想佢哋亂咁紋又後悔，之後要 Cover番仲麻煩。所以每次我都要傾好多次，一個圖分分鐘搞好耐，最長由傾談到完成試過一年半載都有。」正因如此，她每個客人的紋身都有個故事，「好似前排有個女仔搵我幫佢紋梅花，面積由背橫跨至手臂，作品講明用嚟參加比賽，我就幫佢設計咗中國風得嚟又 Modern嘅梅花。亦有次個客為咗紀念媽咪，請我喺背脊紋上爸爸寫的碑文，仲特登寫咗好幾十次，揀到最靚同佢紋。最有意義一次係幫因乳癌切咗乳頭的女士紋身，佢一路講一路喊，紋完後心情反而好咗好多，嗰刻我發現其實紋身唔單止係一種藝術，仲可以幫到人心靈。」
放大圖片 
5.為紀念母親而在背上紋上碑文，令 Joey印象難忘。
放大圖片 
6.客人要求紋的「男兒有淚不輕彈」。
鏟不走愛的紋身
廿多歲的攝影師阿謙身上只有兩個小小紋身，全和名字有關。「細細個就覺得紋身圖案好靚，終於喺 20歲走去紋，喺網上搵到呢個星好特別少人用，我本身叫 Vincent，星星由好多個 V組成，就一於紋咗佢。好多人話紋身好痛，但我覺得縫針仲痛。」到第二個紋身的故事就說來話長，「四年前剛同女友拍咗一年拖，一齊利用大家個英文名設計咗一款字體，最初女友只想用嚟做 Wallpaper，跟住我話不如紋上身，佢最初話唔好，不過見我紋咗佢又紋。」好景不常，拍咗五年拖最終分手，情人走咗但紋身猶在，其他人見到可能會覺礙眼，謙卻從來無諗過鏟走佢。「當初紋嗰陣無後悔，散咗都無。家個女朋友知道呢件事，最初無咩反應，不過半年後就話睇落有啲眼寃，可惜師傅話當初線條紋得太粗好難改，鏟走可能仲肉酸。」再問第日會否和現任女友來多個愛的紋身，他笑笑口話唔會喇！
放大圖片 
■ Jodic話最初想學紋身但無門路，機緣巧合在 Joey店工作拜師成功，現主攻 Dark Side風格。
放大圖片 
■以前的公司老細較傳統，怕影響工作所以將紋身收收埋埋。
放大圖片 
■這粒星星他上網找了很久，線條靚少人用，而且是由 V字組合而成。
放大圖片 
■和舊女友名字合併愛的紋身，他說沒後悔，只是現任女友笑說嫌眼寃。
放大圖片 
7.自家設計的骷髏頭，一邊天使一邊魔鬼翅膀，對比強烈。
放大圖片 
8.熱愛 Dark Side風格的 Jodic，模仿 H.R.Giger的畫作，希望有日能作紋身圖案。
放大圖片 
9.客人要求要超真實的 Poppy Flower， Jodic搵咗好多相先做成，仿真度極高。
放大圖片 
10.將人像線條修改，令它看起來像個面具。
紋上骷髏念亡師 放大圖片 
■ Dick近排熱愛抽象風，最新想喺頸度紋抽象燕子，正在搵法國紋身師傅幫他設計。
單看 Dick周身紋身周身環，普通人一定會以為他是蠱惑仔或不好惹，其實他本身說話溫吞，性格不慍不火，紋上癮全因覺得靚並唔係諗住威。 16歲開始第一個紋身，從此欲罷不能，身上大大細細約十個紋身，一向沒甚麼編排，風格並不統一。「嗰陣圖案唔係咁多有得揀，有啲衝動紋完後唔滿意，之後就要 Cover番佢。」他說舊時已有兩三個 Cover咗但有些圖案太大覆蓋唔到，對紋身完全無悔的他，最後悔是揀錯圖案。被人紋得多自然想學，四年前他拜幫他紋身的人做師傅，希望畀多條路自己行。學習時候找朋友做實驗品，最搞笑是功夫未到家，紋到甩晒色要師傅打救。他右手臂的骨頭紋身就是為了懷念第一個師傅。「上年師傅因為吸毒去世，為咗紀念佢，我親自畫個骷髏頭，因為骷髏代表死亡。」
改圖案最滿足 放大圖片 
11.右手臂的骷髏頭是用來紀念吸毒去世的第一位紋身師傅。
之後 Dick搵到第二個師傅繼續學，終於在一年前選擇筲箕灣平民化商場開店，貪其租平。現時一個月平均有 15-20個客人，估唔到四成是師奶，「試過有啲太太買完餸拎埋入嚟就話要紋身，大部份都係話要紋蝴蝶，其次係花。更厲害有次個媽咪拖住幾歲大嘅女入嚟都係紋蝴蝶，每到呢個時候，我就會問佢哋係咪諗清楚，因為驚佢哋衝動走入嚟後悔。」他說千萬別看輕師奶，原來她們比年輕人更忍得痛。 Dick笑說曾有兩個後生仔入來紋身，點知一見血就面青青想嘔，好彩最後紋得晒。不過相比幫人紋身，他說幫人修改更有挑戰性。「個客都係因為唔滿意先想改，咁喺有限制情況下幫人改得成，滿足感大過就咁幫人紋。」講到尾， Dick還是想在中環開店。
12+13.熱愛槍的他，在手上和肚上紋上自己設計的槍枝圖案。
放大圖片 
12
放大圖片 
13
放大圖片 
14.女仔客人最愛紋花朵圖案。
放大圖片 
15.客人請 Dick將本身的花作修改，他設計了巨型骷髏圖案，非常成功，都算是最滿意作品。
星之紋身
Joey開業四年，同樣有幫明星紋身，例如幫盧巧音在手腕紋上手帶。但 Joey說有時都怕明星效應帶來跟風，好像之後有人想將 Candy紋身照抄上身，她就委婉地拒絕了對方。
放大圖片 
放大圖片 
■肩上梅花是兩年前生日朋友幫手紋，貫徹她愛花和線條的風格。
華 D年代，滿街一幅二幅人皮龍鷹虎鳳，每遇紋身蠱惑仔即彈開三呎；現在紋身雖定性為潮物，但三位八十前──靠紋身餬口的紋身師傅 Jimmy、視紋身為黑道象徵的志雄哥和因紀念祖母而紋身的 Phat──還是苦口婆心說：「紋之前三思。」記者：林佩婷攝影：伍慶泉、楊錦文
不紋即燒舖 放大圖片 
Jimmy
談紋身，不得不提 Jimmy，他爸爸是香港首個紋身師傅，開設的「 Rose Tatto」亦是香港首間紋身店， Jimmy早在 13歲已幫人紋身：「細個成日俾後母打鬧，嬲嬲哋搬去舖頭瞓，十二點收舖，班鬼佬飲醉酒上門話要紋身，咪拎老竇啲工具幫佢哋紋囉，無正式學過 o架。」兩三年後，他問爸爸借工具顏料於亞士厘道開舖，當時尖沙嘴有很多軍人光顧，「最高峯連續四日，朝十一到凌晨四點都要開工，當時一碗白粥賣斗零，一隻飛鷹收$40，條數好襟計。」六十年代，香港蠱惑仔多數紋龍、老虎、鷹等大面積圖案，「以前啲大佬好爽快，擺低一千叫我幫三條 o靚紋身；家差好遠，試過有 o靚仔畀$50要我紋大鷹，唔紋燒舖，搞到我要打畀朋友解決；又有一次，有個人背脊紋完條龍去廁所，點知擒窗走。」他紋龍最精：「外國啲龍搞笑好多，好似漫畫咁，我畫龍講求氣勢同姿態，可以認全世界第一。」近年紋身事業再興起，競爭大了生意反而減少， Jimmy更批評某些師傅根本不識紋身，「喺內地買部機同圖案返嚟印，全無技術可言。」二十年前他搬店到佐敦，別以為紋身師見錢開眼，每個師傅都有自己原則， Jimmy一不紋手指，二不紋頸以上位置，因驚對方後悔，三要看年紀。「唔夠十八歲諗嘢未成熟，唔紋！試過有大佬帶個七八歲仔上門，我話呢個係佢身體，萬一將來後悔盞衰，紋身前真係要諗清諗楚。」
放大圖片 
■ Jimmy（左下）與爸爸（白髮）和日本紋身會長（中）的陳年合照。
放大圖片 
■自己設計圖案，這是當年水兵比較喜歡的圖案。
放大圖片 
■跟 Jimmy學師一年的 John，用毛筆繪龍頭頭是道。
放大圖片 
■拍江湖片，演員的紋身繪圖也請教 Jimmy幫手。
社團標記
說到江湖片，《監獄風雲》肯定是經典之一，飾演大佬盲蛇的志雄哥一身圖案令人印象深刻。他 13歲開始紋身，現全身有超過五十個圖案，第一個紋身是右手的鷹。「嗰陣住山區好多江湖人，成個山啲人都幾乎賣白粉，我無心機讀書，後來加入黑社會，見到班大哥紋身好型，心諗紋番個威吓，即使手瓜超細都紋咗隻鷹，仲要完全唔覺得痛。」紋鷹不單止貪其威猛，還有另一個意義，「唔同圖案代表唔同社團，雙鷹當時代表和字頭，等其他人知道你屬於邊瓣。」紋身不但為他帶來氣勢，還成為他做演員的契機，「 1976年我為《狂潮》做臨記，識到周潤發、林嶺東等人， 1987年南燕寫成《監獄風雲》劇本，搵我幫手，嗰陣日日帶百幾二百個兄弟開工，套戲先拍得成，第二年拍續集，跟住拍戲拍出癮，之後我喺王晶訪問節目裏面宣佈退出江湖，專心拍戲。」直到現在，志雄哥仍然有紋身，希望有朝一日，把整個軀體變成一件好有藝術感的外衣，太太和女兒也不反對，「最爆笑係細嗰個陣，細女以為手上面嘅紋身係公仔食物，成日追住我隻手係咁咬。」他不是為紋而紋，如左手的玫瑰代表對父母的孝心，不過他勸戒年輕人別輕易紋身。「我嗰個年代身在江湖，參與其中先會紋身，其實做人好簡單，就係令家庭得到溫飽，細女未出世前我無嘢做，做地盤都係咁捱，最緊要問心無愧。我希望年輕人要自重，唔好掂毒品，踏入黑社會更加係死路，社會唔會遺棄你，年輕人要做學生讀好書，唔好亂咁紋身。」
放大圖片 
志雄哥
放大圖片 
■志雄哥 20歲在律師樓做師爺追求吳太，吳太對紋身不反感，反而覺得很潮。
放大圖片 
1. 第一個紋身是 13歲時在右手紋的鷹，手瓜變大後，為了好看，再把圖案周圍空白地方填滿。
放大圖片 
2. 最初的小人公仔是赤裸的，細女見到，批評無着衫很肉酸，他即替公仔紋多件衫。
放大圖片 
3. 背上的龍是他當年做大佬的象徵，兩邊女像代表當年酒色財氣的生活，太太覺得最有特色。
放大圖片 
4. 除父母，他將太太和子女的名字紋在左手上作紀念。
放大圖片 
5. 玫瑰代表溫馨和熾熱，用它加上「 Mother」和「 Father」，以示掛住父母。
放大圖片 
6. 除心口雙鷹外，志雄哥最滿意肩上的龍：「紋嗰陣好痛，聽到針刺入骨頭嘅聲音。」
尊重皮膚 放大圖片 
Phat
不知何故，唱 Hip-Pop的人總愛紋身， 24味成員 Phat甚至把個人興趣結集成書，從 20歲和朋友打賭去美國紋了第一個太陽標記，到現在斷斷續續有 17個紋身，心態可分兩個階段講。「第一次孭背囊旅行，心諗去到美國一定要紋身，感覺興奮多過痛。」之後往不同地方，他都會帶一個紀念品回港，到 27歲後，他才自覺真正了解紋身，「 25歲前處於衝動階段，只想填滿空白地方，為紋而紋；到 27歲發現身上空白地方唔多，唔可以再亂浪費『畫紙』，諗圖案同佈局細緻好多。正確紋身觀念係要尊重自己皮膚，紋完唔可以後悔。」
放大圖片 
7. 左手十字架紋身，有嫲嫲去世日期。
自此，他每個紋身都有一個故事，對以前衝動紋下的圖案有沒有後悔？他堅決說沒有：「即使衝動，都證明嗰陣夠膽，係一種態度嘅表現。」他出紋身書《紋上癮》，源自對嫲嫲的思念及信教。嫲嫲在 1999年過世：「嫲嫲件事對我好大影響，我一直想紋嫲嫲個樣，但十年來始終搵唔到嫲嫲靚相，惟有選紋十字架。啱啱嗰陣 24味做完宣傳，有幾個月空檔，就諗不如將紋身過程紀錄落嚟，後尾仲出埋書。紋完之後，我感受到神嘅訊息，牧師都話我係被揀選嘅，我喺上年 6月洗禮。」他勸年輕人紋身前要三思：「我熱愛紋身，對自己決定無悔，若自問承擔唔到後果就唔好試，身體髮膚受諸父母，可以的話不妨徵求父母意見，問一問都係一個尊重。」
放大圖片 
8. 唱歌要有手勢，故在手指紋「 Hong Kong」兩字，十指痛歸心。
放大圖片 
9. 紋在右腳的「 6652」圖案，當時覺得自己邪但未是魔鬼，有踩界意味。
放大圖片 
10. 20歲在美國撞入紋身店紋太陽（最上），後悔紋得太細，故在兩邊手臂各紋夠五個作平衡。
放大圖片 
11. 右腳的「 Iron Man」圖案，是為了《紋上癮》，在新加坡紋身展而紋的。
放大圖片 
■這幅水墨畫紋身令外國師傅震驚，只有中國師傅能紋到， Phat感驕傲。
放大圖片 
■於北京， Phat訪問由農民變成紋身 Model的模特兒。
放大圖片 
■上年推出《紋上癮》，訪問紅星紋身經歷，現正籌備同系列女生篇。
星之紋身
別以為近年明星才流行紋身，想當年明星已經好 In，懂得找 Jimmy紋身，如狄龍、陳惠敏等壯漢， Jimmy：「佢哋完全唔怕痛。」果然是硬漢。
放大圖片 
放大圖片 
場地：銅鑼灣海景酒店（ 3553 2898） 
■他出名畫龍，畫得出龍身轉動時的氣勢。
留言列表
{{ article.title }}
