西貢偷拍巨乳羅仲謙水中享受 Theresa 傅穎壹週刊 1063期 @ 娛樂八掛大放送★

宅男殺手Theresa（傅穎）除了冧電車男有一手外，就連富貴公子林孝賢、台灣偶像敖犬都曾經中招，最新戰績，是搞掂擁有四十二吋巨乳壯男羅仲謙，兩人秘密拍拖三個月。
上星期三（七月十四日），本刊撞破兩人相約西貢出海，出到大海，Theresa同羅仲謙完全解除防範，更完全懶理同行、用以做擋箭牌的電燈膽，兩人毫不避忌鴛鴦戲水攬到實，又箍又抱，親熱度爆燈，就算浸在水中，都未能降溫。

攬住落水
Theresa同羅仲謙一行八人上遊艇出海，當日表面目的是為Theresa好友梁雨恩慶祝生日，但實際是爭取拍拖時間。
上到船，初時Theresa同羅仲謙都刻意保持距離，Theresa忙住陪梁雨恩傾偈切生日蛋糕，就算在船頂玩排球時，她與羅仲謙都沒有太多一齊，直到落水，本身做過救生員的羅仲謙，一馬當先挺四十二吋巨乳插水。
唔識游水的Theresa最後要羅仲謙陪住，先肯落水，其間二人已拖晒手，表現得十分親暱，落到水，羅仲謙用他粗壯的手臂攬住Theresa，任由她當自己是人肉水泡。一經埋身，兩人終於忍唔住，唔再避忌。

纏綿暢泳
有羅仲謙攬住，Theresa早將老死梁雨恩忘記得一乾二淨，兩人仲愈浮愈遠，又不時頭貼頭，越攬越埋，其間，Theresa用手箍實羅仲謙條頸，旁若無人，完全是熱戀中情侶行為。
二人水中獨處一輪後，Theresa同羅仲謙終於歸隊，會合其他人玩香蕉船，同大家玩完一轉後，羅仲謙又要求同Theresa兩人再玩一次，一眾電燈膽識做無阻頭阻勢，一坐上香蕉船，二人胸黐背，羅仲謙從後壓住Theresa外，他的手更放在Theresa大髀上，之後仲玩到「反蕉」，羅仲謙馬上英雄救美，將Theresa抱番上船。
全程羅仲謙對Theresa都特別照顧，玩完香蕉船後，羅仲謙親自幫對方剝衫（救生衣），而Theresa亦毫不避忌，當住對方面前抽bra，之後兩人又一齊在船尾一邊沖身，一邊打情罵俏，Theresa更忍唔住，冧到出手摸羅仲謙塊面。
暢遊五個鐘，大隊一齊返回西貢碼頭，一上岸，Theresa與羅仲謙又打回原形，即時戒備扮唔熟，並分頭離開。

拍拖三個月
隔一日（十六日），Theresa同羅仲謙又再單獨約會，下午五點半，二人雙雙離開九龍灣公司搭的士到黃埔Pokka Cafe撐枱腳，他們選擇坐在餐廳最角落位置，只是男方經常含情脈脈望住Theresa，又將食物溝亂食，不分你我。
據了解，Theresa同羅仲謙已經拍拖三個月。「年頭阿Th（Theresa）發現咗敖犬喺台灣溝咗另外一個台灣model，嗰排佢好唔開心，咁啱佢簽咗星皓識咗同公司嘅謙仔，兩個人經常俾公司安排一齊做嘢，謙仔對阿Th可以話係一見鍾情，但最初阿Th都冇乜反應，因為佢向來都鍾意啲大過佢嘅男仔，謙仔得廿五歲，細過佢一年，所以唔係咁接受到；但係謙仔無放棄，經常氹阿Th開心，又成日借頭借路去探班，之後阿Th覺得謙仔其實好細心又有風度，終於都接受咗，喺五月嘅時候正式一齊。」據他們身邊人說。

自薦情侶檔
雖然拍緊拖，但為怕公司反對，於是他們分別向公司提議以情侶檔姿態接工作，一來可以搵錢，二來又可以有更多攞正牌見面機會，三來萬一公司發覺反對，都可以死撐話因為工作需要。
近月來，亦有人不時目擊羅仲謙在Theresa的寓所藍灣半島出沒，但為了避開耳目，他多數在屋苑側門出入，務求低調戀情。

密密食
出道八年，Theresa與不少男、女星傳出緋聞，最令人印象深刻的，莫過於與何韻詩的斷背情。

何韻詩
○二年仍是Cookies成員的Theresa，因與何韻詩同屬一間唱片公司，有指Theresa介入何與容祖兒的友好關係，更有傳她搬入何的大坑道寓所同居。

方力申
○五年加盟正東的Theresa與小方合唱《自欺欺人》撻着，當時小方正處於阿嬌與Stephy的三角關係中，傳聞小方曾說：「好多人話Theresa難追，所以追佢有挑戰性。」

富家子
○六年經「舊相好」小方介紹下，Theresa與任職跨國企業人力資源顧問的蘇頌智（Neal）拍拖，蘇父搞航運生意及貿易公司，屬大富之家，後來男方父母及唱片公司反對，二人甩拖。

林孝賢
○八年與林建岳兒子林孝賢在蘭桂坊食意大利菜，再由男方駕車送她返回西環寓所，傳聞被林公子力追。

敖犬
同年Theresa被公司冷待，到台灣與「棒棒堂」成員敖犬拍電影《熱血同盟》撻着，二人更把台灣遊的照片放上blog晒幸福。

鄭中基
去年Theresa推出新書，書中提及她在圈中遇過愛情騙子，雖沒有開名指是太子爺鄭中基，但因二人早年曾合作電影《三分鐘先生》及《黑拳》，矛頭指向鄭，後來有傳太子基下令因此雪藏玩謝Theresa。

童顏巨乳
廿五歲的羅仲謙，○一年在大埔官中中五畢業後，報讀拯溺課程，在屋苑會所泳池做救生員，其間曾報考消防員，最後被星皓電影公司發掘簽約投身演藝界。○八年在青春劇《盛裝舞步愛作戰》小試牛刀，直至近年的《尖子攻略》、《古靈精探B》及《搜下留情》推出後，大隻仔形象入屋。一臉孩子氣的他擁有四十二胸肌，被冠以「童顏巨乳」稱號，愈操愈大胸的他，經常在幕前大晒健碩身形。

海上斷正
不少名人、藝人為避開傳媒耳目，都選擇出海遊船河，但其實在船上並非想像中安全，加上透明度極高，近年亦有不少情侶失手被斷正。

小小超
02年李澤楷自從與盈科之花Karen Lam分手後，有傳他交上新女友，更被發現與一名女伴Susanna登上價值3,000萬的遊艇出海，二人在船艙內更傾偈相當投契。

Baby
08年Angelababy與同公司一班model出海，其實男友William鬼祟坐另一艘遊艇會合，二人更在船上拖手攬頸，表現親密。

薛二少
上月Neway二少薛嘉麟被拍到背住女友諸葛梓岐出席船P，二少玩得盡興，更被其中一名女伴攬到實，事後諸葛梓岐力撐，指該女是朋友的女友，大家相識。

14/7 射埋身
Theresa同羅仲謙一齊沖身，他們被花灑射埋身，表現得十分興奮，Theresa更伸手摸羅仲謙塊面。

今次船河目的表面上是Theresa替梁雨恩慶祝生日。

揞胸
擁有四十二吋巨乳的羅仲謙，一上船就急不及待除衫騷胸，但見巨乳被人望到實，怕醜要用手揞住。

拖手
唔識游水的Theresa要羅仲謙傍住先敢落水。

兩人在水中攬到實。

高潮樣
曾自爆睇鹹片學放電的Theresa，在水中電到羅仲謙冧晒，不經意流露高潮樣。

剝衫
羅仲謙非常細心主動幫Theresa剝救生衣。

扯bra
在男友面前扯bra，Theresa毫不尷尬。