娛樂圈添丁喜訊一單接一單,繼張栢芝五月為謝霆鋒誕下次子Quintus後,以為下一個會係佗孖B的巨肚黎姿,點知原來早在六月尾,Isabella梁洛施已秘密於美國搶閘誕下孖仔,母子平安!
再做老豆,仲要打孖上,陪完Isabella生仔返港的李澤楷,忍唔住同朋友分享喜訊,據知三母子仍會留响美國休息一段時間。

純屬意外
去年四月,Isabella秘密到加拿大為李澤楷誕下長子長治,事隔兩個月後,更將全家福發放俾傳媒,將二人關係及添丁喜訊,同一時間公告 天下。
雖然Isabella未正式成為「李太」,但今年廿二歲的她,年輕力壯生B話咁易,更於去年年尾發現意外懷孕,再為李家繼後香燈。
「生咗大仔之後,聽Richard講打算抖陣先,點知真係一陣,生完半年唔夠,Isabella又有咗,我哋都笑Richard有心有力,佢就誓神劈願話係意外,佢都唔想Isabella咁辛苦。」李澤楷身邊人說。
話晒李家祖籍潮州,生仔唔會嫌多,更何況產前檢查時,發現原來係孖胎。
「做產檢發現係孖,Richard同Isabella都覺得好開心,後來知道仲係孖仔,簡直驚喜到不得了,聽佢哋講,Isabella屋企人嗰邊有生孖胎紀錄,佢都估唔到自己可以有機會佗孖仔。」知情人說。

老豆報喜
雖然好事成雙,但再做老豆的李澤楷未有將喜事四處張揚,即使傳媒較早前收到添丁傳聞,李澤楷一概封嘴拒絕回應。
「Richard唔想Isabella受到傳媒騷擾,原本安排佢去加拿大待產,但嗰邊實在太多華人,怕行蹤會洩露,最後Isabella去咗美國生BB。」知情人說。
Isabella最後一次在港公開露面,是今年一月到紅館欣賞鄭秀文尾場個唱,當時已懷有身孕的她,即使睇騷睇得投入,卻未有像其他fans般舉手跳舞,保護住肚內的小生命!
「其實Isabella都係早兩個月先飛走,其間一直响香港,有時Richard做生意行開行埋,冇時間陪佢,Isabella會叫司機車佢出街食飯郁動吓,佢好小心o架,每次出街都撞唔到狗仔隊!」Isabella身邊友人說。
Isabella同孖仔暫時會繼續留响美國生活,至於陪女友待產的李澤楷,早前返到香港,便馬上向身邊好友報喜。
Isabella個肚咁生性,要正式成為李家新抱,唔難!

火併肚皮
擁有千億身家的香港首富「超人」李嘉誠,長子李澤鉅及次子李澤楷一直努力為李家生番個金笸籮。可惜李澤鉅與太太王儷橋(前名王富信)生極都係女,辛苦十年才搏到個仔。相反,事事同老豆「包拗頸」的李澤楷,估唔到同女友梁洛施一擊即中,連生兩胎都係男孫,超人更加錫到燶。

梁洛施
年齡:22歲
結識:○七年拍電影《盜墓迷城3》,經楊紫瓊介紹認識李澤楷。翌年由小小超出面幫她與英皇打解約官司,從此退出娛樂圈,數個月後更為小小超誕下麟兒。
出身:年幼喪父,母親在澳門賭場工作,十二歲小學畢業便輟學簽約英皇,十五歲加入娛樂圈唱歌拍戲出寫真,十九歲憑電影《伊莎貝拉》封為葡萄牙影后。之後有小小超代出面與英皇解約,她稱當時被公司不平等對待。
名份:暗地拍拖,雖為李家誕下三子,仍未正式結婚,身份未獲肯定。
肚皮狀況:拍拖一年,在○九年為小小超誕下長子長治,勝在後生身體好,休養半年意外懷孕,誕下孖胎,兩年抱三丁。

王儷橋
年齡:41歲
結識:原名王富信,九○年在加拿大讀書時,結識到當地公幹的李澤鉅,並開始拍拖。
出身:父親王華瑞退休前是紡織商人,出身自中產家庭,身家清白。
名份:九三年二人在香港註冊結婚,正式入門,老爺李嘉誠經常大讚新抱賢淑。
肚皮狀況:王儷橋九六年誕下長女李燕寧,○○年輪到次女燕容,○三年第三胎繼續生女,直到○五年改名,翌年即誕下男丁,生足十年才收工。

EIsabella今年一月初到紅館欣賞鄭秀文演唱會尾場,估計當時已懷孕約三個月,故穿上闊身外套遮肚。(《FACE》圖片)

將戀情收收埋埋,直到長子李長治出世後兩個月,李澤楷才一次過公開戀情及添丁喜訊。

我要一隻手 抱一個孫!設計對白
抱孫打孖上,再做爺爺的李嘉誠,將來湊孫一定好唔得閒。

只有15個月大的李長治,已經做人大哥,多了兩個孖胎細佬將來同佢爭玩具玩。

同孖仔身在美國休養的Isabella,一次過湊兩個BB周身唔得閒,好在有媽媽貼身照顧,幫輕唔少。

徐子淇同李家誠連生兩個都係女,睇嚟係時候向Isabella請教生仔秘方。

梁洛施搶閘生雙胞胎 李澤楷同朋友分享喜訊

娛樂圈生子喜訊一單接一單,繼張柏芝5月爲謝霆鋒誕下次子Quintus後,以爲下一個會是懷著雙胞胎的黎姿,誰知原來早在6月底梁洛施已秘密于美國搶閘誕下雙胞兒子,母子平安!

李澤楷再做父親,還是雙胞胎兒子,陪完梁洛施生子返回香港的他忍不住同朋友分享喜訊,據知三母子仍會留在美國休息一段時間。

arrow
arrow
    全站熱搜

    stinglife 發表在 痞客邦 留言(0) 人氣()